Атырдьах ыйа ардаҕынан түмүктэниэ….

Сайын бүтэһик нэдиэлэтэ киин улуустарга уонна Дьокуускайга ардаҕынан түмүктэниэ. Ол да буоллар, салгын температурата нуорматтан үрдүк буолуо.

Бу туһунан ЯСИА-ҕа Саха сиринээҕи Гидрометеосулууспа начаалынньыгын солбуйааччыта – Гидрометкиин начаалынньыга Татьяна Маршалик иһитиннэрдэ.

«Сайын бүтэһик нэдиэлэтин саҕаланыыта олус сылаас күннэр турдулар. Маннык күн-дьыл киин улуустарга уонна Дьокуускайга сэрэдэҕэ эмиэ хатыланыа — +24… +26 кыраадыыска диэри сылаас буолуо. Хотугу уонна арҕаа салгын фроннара үөскээн саҕалаатылар, онон сэрэдэттэн Саха сирин арҕаа өттүгэр быстах ардахтар уонна этиҥнээх ардахтар түһүөхтэрэ», — диэн Маршалик эттэ.

Барыллаан сабаҕалааһынынан, киин улуустарга уонна Дьокуускайга ардах чэппиэргэ уонна бээтинсэҕэ түһэрэ күүтүллэр.

«Быстах ардахтар, этиҥнээх ардахтар түһэллэрэ күүтүллэр. Ону таһынан салгын температурата 3–5 кыраадыһынан түһүө, ол эрээри температура син биир нуорматтан үрдүк буолуо. Атырдьах ыйын бүтэһик күннэригэр температура +18… +23 кыраадыыс сылаас буолара сабаҕаланар», — диэн Татьяна Маршалик иһитиннэрдэ.