Атырдьах ыйыгар өссө сылыйыа дуо?

Сылаас күн-дьыл өссө төннүө дуо? Атырдьах ыйыгар күн-дьыл хайдах буолуоҕун туһунан гидрометеорологическай киин начаалынньыга — УГМС салайааччытын солбуйааччы Татьяна Маршалик кэпсээтэ диэн ЯСИА суруйар.

“Быйыл сайын куйаас муҥутуур өрөгөйдөөбүт күнүнэн от ыйын 22 күнэ этэ, Дьокуускайга кыраадыс +32,4 диэри үрдээбитэ. Ону кытта бу нэдиэлэ бүтүүтүттэн өрөспүүбүлүкэ киин өттүгэр +22 кыраадыска диэри сылыйыаҕа, ол эрээри, куйаас күннэр аны буолбаттар”, — диэтэ Татьяна Маршалик. Сабаҕалааһын быһыытынан, Саха сирин үгүс улуустарыгар атырдьах ыйыгар кыраадыс орто көрдөрүүтэ нуорма иһиэн буолуоҕа.

“Ыйдааҕы сабаҕалааһыннар куруук туолаллар диэн буолбатах, онон  нэдиэлэтээҕи сабаҕалааһыҥҥа болҕомтону уурар ордук. Сабаҕалаан көрдөххө, атырдьах ыйыгар өрөспүүбүлүкэ улахан өттүгэр салгын кыраадыһа нуорма иһинэн буолара күүтүллэр, сөҥүү түһүүтэ эмиэ нуорма иһинэн. Сороҕор аҕыйах да буолуон сөп. Хас биирдии оройуоҥҥа атырдьах ыйынааҕы нуорма тус-туспа буолар: киин улуустарга +15 кыраадыс, арҕааҥҥы улуустарга  +14 кыраадыс уонна хоту улуустарга +10″, — диэн эспиэр эбэн эттэ.