Атырдьах ыйыгар кимнээх биэнсийэҕэ эбилик ылалларый?

Үлэлиир биэнсийэлээхтэр, лүөччүктэр, 80 саастарын туолбуттар — бу атырдьах ыйыгар үрдэтиллибит биэнсийэни ылар дьон испииһэгэ. Өссө кимнээх улаатыннарыллыбыт төлөбүргэ тиксэр кыахтаахтарый? Бу туһунан «Парламенская газета» суруйар.

Атырдьах ыйыгар бочуоттаах сынньалаҥҥа тахсыбакка, салгыы үлэлии сылдьар кырдьаҕастарга биэнсийэлэрин саҥаттан ааҕан биэриэхтэрэ. Госдуумаҕа  Бас билии, сир уонна баай-дуол сыһыаннаһыыларын кэмитиэтин бэрэссэдээтэлэ Сергей Гаврилов биэнсийэлээх салгыы үлэлиирин түмүгэр үлэ биэрээччи ааспыт сылга төлөөбүт страховой усунуостарын суотугар биэнсийэ коэффициенын  улаатыннарарын санатта.

Ону таһынан, атырдьах ыйыгар саҥаттан ааҕыллыбыт биэнсийэни соторутааҕыта үлэлэриттэн уурайбыт кырдьаҕас дьон эмиэ ылыахтара. «Үлэтин тохтоппутун кэннэ биэнсийэлээх көтүтүллүбүт индексацияларын барытын, ол иһигэр бигэргэтиллибит чааһын, сөргүтэр бырааптанар», — диэн Сергей Гаврилов эттэ. Хос ааҕыы биэнсийэлээх үлэттэн уурайбыт ыйын кэнниттэн кэлэр ый бастакы күнүттэн оҥоһуллар уонна кэлэр биэнсийэтин кытта бииргэ төлөнөр. Үлэттэн уурайарга былааннанар дьон манныгы учуоттууллара наада: өскөтүн ый бүтэһик күнүгэр уурайдахха, эбиликтээх биэнсийэни аныгыскы ый бастакы күнүттэн төлөөн барыахтара. Оттон ый саҕаланыытыгар уурайдахха — бу дьайыы биир ыйынан хойутуоҕа.

Атырдьах ыйыгар биэнсийэҕэ ый аайы төлөнөр эбиликтэри гражданскай авиация сөмөлүөттэрин лүөччүк экипажтарын чилиэннэригэр уонна чох бырамыысыланнаһын үлэһиттэригэр саҥаттан ааҕыахтара. Бу төлөбүрдэр кинилэргэ ыарахан үлэ усулуобуйатынан сибээстээн олохтоммуттар.

Ону кытта атырдьах ыйыгар от ыйыгар 80 саастарын туолбут кырдьаҕастарга биэнсийэлэрин бигэргэтиллибит төлөбүрдэрин икки бүк улаатыннарыахтара. Ону таһынан, биэнсийэ үрдээһинигэр I группалаах инбэлиит буолбуттар эмиэ эрэнэр кыахтаахтар.