Атырдьах ыйын 11 күнэ: сорох сиринэн этиҥнээх ардах, күнүс +30°

Бүгүн, атырдьах ыйын 11 күнүгэр, Саха сирин соҕуруу өттүгэр быстах ардахтыыр, сорох сиринэн этиҥнээх ардах түһүөҕэ.

Өрөспүүбүлүкэ хотугулуу-илин, хоту, хотугулуу-арҕаа улуустарынан кыралаан ардыыр, сорох сиринэн күүстээх ардах түһэрэ күүтүллэр. Бу туһунан Саха сиринээҕи Гидрометеосулууспа саайта иһитиннэрэр.

Этиҥнээх ардах кэмигэр тыал сөкүүндэҕэ 15-20 м. диэри күүһүрүө.

Салгын температурата түүн +8…+13°, хоту улуустарга +3…+8° кыраадыс сылаас. Күнүс +19…+24°, соҕуруулуу-арҕаа +25…+30°, хоту улуустарга +14…+19°, ардах кэмигэр +9…+14° кыраадыс буолуо.

Дьокуускайга түүн +11…+13°, күнүс +22…+24° кыраадыс сылаас. Сөҥүүтэ суох, тыал хотугулуу-арҕааттан сөкүүндэҕэ 3-8 м. түргэннээх.