Атырдьах ыйын 7 күнэ: ардах, инчэҕэй хаар, хаһыҥ

Бүгүн, атырдьах ыйын 7 күнүгэр, Саха сиринээҕи УГМС саайтын дааннайынан, өрөспүүбүлүкэ хотугулуу-илинигэр быстах ардыыр, Томпо, Муома, Абый улуустарыгар сорох сиринэн күүстээх ардахтар, хайалаах сирдэринэн инчэҕэй хаардаах, Томпо улууһугар сорох сиринэн этиҥнээх ардахтар түһүөхтэрэ.

Бүлүү бөлөх улуустарыгар, киин улуустар арҕаа өттүлэригэр сорох сиринэн быстах ардах түһүөҕэ. Сиккиэр тыаллаах, ардыгар сөкүүндэҕэ 9-14 м.тиийэ күүһүрүө. Өлүөнэ алын тардыытыгар, Эбээн-Бытантай улууһугар уонна этиҥнээх ардах кэмигэр сиккиэр тыал 15-20 м. диэри күүһүрүө.

Салгын температурата түүн +8…+13°, халыннаҕына +1…+6°, Бүлүү бөлөх улуустарыгар 0…-2° диэри тымныйар,  хаһыҥ түһэр, хоту өттүгэр 0…-5° диэри тымныйар.  Күнүһүн салгын температурата +13…+18°, соҕуруу-арҕаа, соҕуруу, соҕуруу-илин +17…+22°, хотугулуу-илин +5…+10° кыраадыс сылаас буолуо.

Дьокуускайга түүн сөҥүүтэ суох, күнүһүн кыралаан ардыыр, тыала арҕааттан сөкүүндэҕэ 4-9 м. түргэннээх. Салгын температурата түүн +8…+10°, күнүс +15…+17° кыраадыс сылаас.