Атырдьах ыйын 8 күнүгэр орто үөрэххэ докумуоннары тутуу саҕаланыа

Атырдьах ыйын 8 күнүгэр докумуону тутуу Биир кэлим күнэ ыытыллыаҕа.

Бу күн үөрэххэ туттарсааччылар кэллиэстэргэ, тиэхиньикумнарга киирэргэ докумуон туттарыахтарын сөп. Тэрээһин Дьокуускай куоракка «ПрофМаршрут: старт карьеры» бырайыак чэрчитинэн ыытыллар.

Тэрээһин Доҕордоһуу болуоссатыгар күнүс 11-16.30 чааска диэри ыытыллыаҕа. Манна өрөспүүбүлүкэ бары кэллиэстэрэ, тиэхиньикумнара кэлэн кыттыыны ылыахтара. Оҕолор уонна төрөппүттэр үөрэххэ тутар хамыыһыйа үлэһиттэрин, үөрэх кыһаларын бэрэстэбиитэллэрин сирэй көрсөн кэпсэтиэхтэрэ, тоҕоостоох ыйытыыларга эппиэттэри булуохтара. Бу күн хас да үөрэххэ тута докумуону туттарыахха сөп буолуоҕа. Онон үөрэххэ туттарсааччылар өрөйүҥ-чөрөйүҥ!

Бэлиэтээн суруйдахха, орто анал үөрэххэ докумуону тутуу атырдьах ыйын 15 күнүнэн бүтэр. Бүгүҥҥү күҥҥэ 31 791 докумуону тутан олороллор.