Атырдьах ыйынааҕы мунньах бу ый 21-23 күннэригэр былааннанар

Саха сирин үөрэҕин үлэһиттэрин атырдьах ыйынааҕы үгэскэ кубулуйбут мунньахтарын бу ый 21-23 күннэригэр ыытар былааннаахтар. Бу туһунан Үөрэх уонна билим министиэристибэтэ иһитиннэрэр.

Сыллата ыытыллар тэрээһин өрөспүүбүлүкэҕэ  үөрэх хаачыстыбатын уонна иитиини тупсарарга дьулуһар идэтийбит дьону түмэр. Быйылгы пуорум “Воспитание личности в едином образовательном пространстве” диэн сүрүн тиэмэлээх барарын быһыытынан, ураты суолталаах ааһара былааннанар.

Пуорумҥа педагогтар, үөрэх тэрилтэлэрин салайааччылара, төрөппүттэр уонна уопсастыбаннай тэрилтэлэр бэрэстэбиитэллэрэ санаа атастаһыахтара. Кыттааччылар үөрэххэ ситиһиилээхтик туһаммыт бэйэлэрин үлэлэрин, уопуттарын, идиэйэлэрин үллэстиэхтэрэ. Бу өрөспүүбүлүкэҕэ барытыгар туһаныллыан сөптөөх бастыҥ быраактыканы, мэхэниисими буларга көмөлөһүөҕэ.

Тэрээһин хас даҕаны хайысханан барыаҕа. Ол түмүгэр үөрэх бары көрүүлэрэ хабыллыахтара. Бу туһунан Үөрэх уонна билим министиэристибэтин саайтыгар суруллар. Үөрэх үлэһиттэрин Атырдьах ыйынааҕы мунньаҕын бырагырааматын сиһилии манна көр.