Атырдьах ыйа: олоххо киирэр сокуоннар, уларыйыылар

Бааннар сокуоннай саастарын ситэ илик оҕолорго счету төрөппүттэрин сөбүлэҥинэн эрэ арыйар буолуохтара. Бу туһунан атырдьах ыйын 1 күнүттэн олоххо киирэр сокуоннартан биирдэстэрэ буоларын Госдуума бэрэссэдээтэлэ Вячеслав Володин бэйэтин ТГ-ханаалыгар иһитиннэрдэ.

«Саастарын ситэ илик оҕолор үксүгэр түөкүннэр сиэртибэлэрэ буолаллар. Ол курдук оҕолор каарталарынан уоруллубут үбү-харчыны уу харчыга устан ыларга туһаналлар. Төрөппүт хонтуруолугар маннык быһыы-майгы тахсарын туоратыахха сөп», — диэн Госдуума бэрэссэдээтэлэ быһаарда.

Олоххо киирэр өссө биир сокуон сибээс операторыгар сайабылыанньа суруйан, СМС-ыытыылартан аккаастанар кыаҕы биэриэҕэ.

«Бу быһаарыы гражданнары төлөпүөн уонна интэриниэт түөкүннэриттэн көмүскүүргэ көмөлөһүөҕэ, ону таһынан спамы утары охсуһууга туһалыаҕа», — диэн Вячеслав Володин бэлиэтээтэ.

Итини тэҥэ, атырдьах ыйын 3 күнүттэн сэриигэ олохторун толук уурбут буойуннар көмүүлэрин уонна дойдубут интэриэһин көмүскээһиҥҥэ өлбүттэр кэриэстэрин үйэтитэр атын эбийиэктэри түһэрии, киртитии иһин холуобунай эппиэтинэс киириэҕэ.

«Бу Арассыыйа иһигэр да, тас дойдуларга да баар мэҥэ бэлиэлэргэ, ытык пааматынньыктарга сыһыаннаах. Саамай улахан накаастабыл — буруйдаах 5 сылга диэри көҥүлэ быһыллар», — диэн Вячеслав Володин чуолкайдаата.

Байыаннай дьайыы кыттыылаахтара эбии өйөбүлү ылыахтара. Ол курдук, кинилэргэ биир кэлим судаарыстыбаннай эксээмэн түмүгүн иһитиннэрии болдьоҕо уһатыллыаҕа.

«Бу миэрэ дойдуну көмүскээччилэргэ үөрэххэ киирэр кыахтарын улаатыннарыа, ону таһынан сулууспа кэнниттэн олоххо түргэнник үөрэнэллэригэр көмөлөһүө», — диэн Госдуума бэрэссэдээтэлэ эрэллээҕин биллэрдэ.

Атырдьах ыйын 3 күнүттэн олоххо киирэр өссө биир сокуон, улахан кээмэйинэн маарката суох арыгыны уонна табаҕы эргинии иһин холуобунай эппиэтинэс олохтонуоҕа.