Атыыр куһу хаһан бултуубут?

Сандал сааспыт бу тиийэн кэллэ. Онон, кусчуттар булт маҕаһыыннарын саппат буоллулар. Үгүс кусчуттары тыыннаах угуйар тыһы куһу туһанан (подсадной)  атыыр куһу бултааһын болдьоҕо интэриэһиргэтэр.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин булт уонна ураты харыстанар сирдэр департаменын сүрүн исписэлииһэ Анатолий Попов быһаарбытынан, бу СӨ Ил Дарханын 2021 с. муус устар 1 күнүнээҕи “Об определении видов разрешенной охоты и сроков осуществления охоты в охотничьих угодьях РС(Я) (с изменениями и дополнениями” 1786 №-дээх Ыйааҕын 2-с сыһыарыытыгар 2023 сыл бэс ыйын 22 күнүнээҕи 2916 №-дээх Ыйааҕар олоҕуран киирбит уларытыы буолар. Ол курдук, бары улуустарга (оройуоннарга) атыыр куһу бултуурга  иитиэх (подсадной) куһу туһанан бултааһын муус устар 25 күнүттэн бэс ыйын 10 күнүгэр диэри көҥүллэнэр диэн ыйаахха суруллубут.  Инньэ гынан  бултуур болдьох уһаан биэрбит.