Атыыттан киирбит үп өрөспүүбүлүкэ бүддьүөтүгэр киирэр

Алтынньы 22-23 күннэригэр Ил Түмэн уон төрдүс пленарнай мунньаҕа буолуохтаах, дьокутааттар Ил Дархан Төрүт Сокуоҥҥа уларытыылары киллэрэргэ этиилэрин көрүөхтээхтэр.  

Уларытыылар тоҕо киирэллэрин Ил Түмэн спикерин солбуйааччы Афанасий Владимиров “Якутия 24” биэриигэ өссө төгүл дьоҥҥо быһааран эттэ:

-Уларытыы киирдэҕинэ, Ил Дархан биир эмэ ыксаллаах балаһыанньаҕа кытаанах усулуобуйаны тутуһан туран, өрөспүүбүлүкэ олохтоохторун интэриэһигэр пуондаҕа баар күндү таастары атыылыыр быраабы ылар. Атыыттан киирбит үп өрөспүүбүлүкэ бүддьүөтүгэр киирэр. Төрүт Сокуон 72 ыст. 14 ч. быһаарыллан турар, Ил Дархан өрөспүүбүлүкэ Гохраныгар баар күндү металлар, күндү таастар хараллан сытыыларын хааччыйар диэн. Күндү металлар, таастар тустарынан федеральнай уонна Саха сирин сокуоннарыгар “СӨ сыаннастарын судаарыстыбаннай харайар сир” диэн өйдөбүл суох, ол иһин сокуон барылыгар СӨ күндү металларын, таастарын судаарыстыбаннай пуондата диэҥҥэ уларытар этии киирбитэ.

Өрөспүүбүлүкэ бу күндү металларга, таастарга сокуона өссө 2023 сыллаахха быһааран турар,  Пуонда күндү металларын уонна таастарын ис-тас ырыынакка атыылыыр быһаарыыны Ил Дархан боломуочуйатыгар киллэриэххэ диэн. Эмиэ бу Сокуонунан ити Пуонданы тэрийэр, толорор уонна туһанар бэрээдэк олохтоммута, ону кытта онно баар сыаналаах таастарынан араас эпэрээссийэни оҥоруу СӨ бырабыыталыстыбата бигэргэппит Пуонда туһунан Балаһыанньатынан быһаарыллар буолбута.

Бу Балаһыанньаҕа “Госпуонда сыаннастарын атыылыыр сыаллаах таһаарыыга СӨ судаарыстыбаннай былааһын уорганнарын хардарыта дьайсыыларын бэрээдэгэ” VI раздел баар, онно Ил Дархан, Бырабыыталыстыба, бырабыыталыстыба хамыыһыйата, Үп министиэристибэтэ хайдах хардарыта дьайсыахтаахтара сиһилии сурулла сылдьар. Онон Ил Дархан тус бэйэтэ эрэ быһаарыыны ылынар диэн дьон олох сыыһа өйдөбүлү түмүк оҥосто сылдьар.

Маны кытта Төрүт Сокуон 56 ыст. 7 п. сөп түбэһиннэрэн, Госпуонданы хонтуруоллааһын Ил Түмэн конституционнай боломуочуйатынан буолар.