Аудиовизуальнай киин үлэһиттэрэ туора турбаттар

Нам улууһугар буолбут быйылгы халаан уута биир өттүнэн улахан эрэйи да аҕаллар, иккис өттүнэн дьону-сэргэни түмэр, сомоҕолуур күүһүнэн буолла. Билигин халааҥҥа ылларбыт улуустарга көмө тохтоло суох оҥоһулла турар.

Ыам ыйын 24 күнүгэр Саха сирин норуоттарын аудиовизуальнай нэһилиэстибэлэрин национальнай киинин үлэһиттэрэ Нам улууһун Граф биэрэгэ нэһилиэккэ көмөлөһө тиийдилэр. Үлэ бэтэрээнин дьиэтигэр тиийэн, олбуоругар халаан уута куппут бөҕүн ыраастаатылар, саһаан маһын оннугар туруордулар, о.д.а. үлэлэри оҥордулар. Дьиэни куурдарга бэлэмнээн, улахан малы-салы, миэбэли таһырдьа таһаардылар.

Маны таһынан Аудиовизуальнай киин шефтэһэр тэрилтэтэ — Дьокуускайдааҕы П.И. Дудкин аатынан сибээс уонна информационнай технологиялар колледжтарын устудьуоннара эмиэ туора турбакка, гуманитарнай көмөнү куруустуурга уонна тарҕатарга көмөлөһөллөр.

“Халааҥҥа түбэспит Нам улууһун дьонугар көмөлөһөр туһунан этии киирээтин кытта харчы хомуйбуппут, оттон бэйэлэригэр тахсан көмөлөстүбүт. Үтүө санаалаах дьон көмөтүнэн  халаантан эмсэҕэлээбит дьон урукку олохторо төннүө диэн эрэнэбит”, — диир Аудиовизуальнай киин дириэктэрэ Степан Москвитин.

Аудиовизуальнай киин үлэһиттэрэ Анастасия Петрова уонна Марина Винокурова Хатырык нэһилиэгэр олорор киинэ бэтэрээннэригэр Т.Д. Павловаҕа, А.А. Ноговицынаҕа, Х.Е. Поповаҕа тэрилтэлэрин аатыттан аһы-үөлү, наадалаах малы-салы тиэртилэр.

СӨ кинематографиятын бэтэрээннэрин ааттарыттан Сэбиэт бэрэссэдээтэлэ Полина Николаевна Лепчикова халаантан эмсэҕэлээбит киинэ бэтэрээннэригэр 25600 солкуобайдаах аадырыстаах көмөнү, эмиэ итинник 13800 солк. материальнай көмөнү спонсор Антонина Саввична Алексеева оҥордулар. Нам улууһун Киинэ бэтэрээннэрин сэбиэтин бэрэссэдээтэлэ Вера Дмитриевна Попова көмөлөрүн иһин барҕа махталын тириэрдэр.