Аудиовизуальнай нэһилиэстибэ пуондата байытыллар

Киһи аймах бу олоххо бэйэтин төрүттэрин, ийэтин-аҕатын, дьиэ кэргэнин үтүө үгэстэрин холобур оҥостон илдьэ сылдьар. И.С.Жараев аатынан Саха Өрөспүүбүлүкэтин  норуоттарын  аудиовизуальнай нэһилиэстибэтин национальнай киинигэр (дириэктэр Степан Иванович Москвитин) 130-ча пуонда баар. Бу киирэр матырыйааллары тэрилтэлэр, биирдиилээн устар устуудьуйалар эрэ буолбакка, Саха сирин биллэр-көстөр дьиэ кэргэттэрин ийэлэрэ, аҕалара, оҕолоро, сиэннэрэ эмиэ туттараллар.

Холобур, Курилова Ладина Гаврильевна аҕата,  Аллараа Халыма дьүкээгирдэрин   култууратын тарҕатааччы, гуманитарнай чинчийиилэр уонна хоту аҕыйах ахсааннаах норуоттар кыһалҕаларын үөрэтэр институт лингвист-учуонайа Гаврил Николаевич Курилов-Улуро Адо туһунан аудиовидео матырыйаалы, тэлэбидиэнньэ биллэр суруналыыһа  Руслан Валерьевич Очиров Үөһээ Бүлүү Ботулуутуттан  төрүттээх эһээтэ, Саха көрдөрөр-иһитиннэрэр хампаанньа араадьыйаҕа уонна тэлэбидиэнньэҕэ салаатыгар “Геван” биэрии эрэдээктэринэн үлэлээбит бэйиэт, суруйааччы Степан Егорович Дадаскинов уһулан хаалларбыт  киинэ пленкаларын аҕалан үйэтиттилэр.

Маны сэргэ, 1976 сыллааҕы  Олимпиада үрүҥ көмүс призера  Александр Николаевич Иванов дьиэ кэргэнин, үлэтин, успуорка бэлиэ түгэннэрин көрдөрөр видео-устуулара биһиги тэрилтэбитигэр анал пуондаланна.

Чурапчы улууһун Мугудайыгар өр кэмҥэ Култуура сынньалаҥ дьиэтин дириэктэринэн  үлэлээбит СӨ култууратын туйгуна Лаврентьев Владимир Михайлович араас  уопсастыбаннай тэрээһиннэри, ол иһигэр  “Чөл олох”  эр дьон  түмсүүлэрин көҕүлээччитэ этэ. 1990 сыллартан  видео, DVD  кассеталарга устан хаалларбыт тыа сирин олоҕун-дьаһаҕын көрдөрөр түгэннэрин кыыһа Светлана Владимировна Диодорова-Лаврентьева  туттара сылдьар.

Пуондаҕа киирбит матырыйааллар сыллата эбиллэ туруохтаахтар. Ол курдук, “Хотугу сулус” телерадиоакадемия сүрүн эрэдээктэрэ Татьяна Афанасьевна Гоголева 1989 сылтан саҕалаан, бу күҥҥэ диэри  өрөспүүбүлүкэ олоҕун-дьаһаҕын көрдөрөр видео-устуулара киирэ тураллар. Онно “Семья года”, “Азия оҕолоро” эдэр кэрэспэдьиэннэр  үлэлэрэ уонна да араас элбэх биэриилэр бааллар. Сэрии кэмин, Чурапчы көһүүтүн, элбэх харах уулаах ахтыылары сэрии, үлэ бэтэрээннэриттэн устан үйэтиппит дьонтон биирдэстэрэ, тэлэбидиэнньэ  биллэр суруналыыһа Иннокентий Михайлович Слепцов үлэлэрэ эмиэ бааллар. Манна кини дьиэ кэргэнин, оҕолорун тустарынан баай пуонда көрүллэр.

Марина ВИНОКУРОВА, аудивизуальнай нэһилиэстибэ национальнай киинэ