Августина Филиппова аатын бөдөҥ алмааска иҥэрдилэр

Саха таҥаһын үрдүк таһымҥа таһаарбыт биллэр худуоһунньук, модельер-дизайнер, педагог Августина Филиппова аатын улахан алмааска иҥэрдилэр.

Августина Филиппова — СӨ култууратын үтүөлээх үлэһитэ, РФ үөрэҕириитин бочуоттаах үлэһитэ, «Во славу и пользу республики» култуураны, науканы, үөрэҕириини сайыннарыыга көмөлөһөр пуонда лауреата, «Полярная звезда», «Гражданскай килбиэн» бэлиэ хаһаайката, РФ Худуоһунньуктарын сойууһун чилиэнэ, Горнай улууһун уонна Амма нэһилиэгин Ытык олохтооҕо.

Удачнайдааҕы ГОК Заполярнай туруупкатыгар 2025 сыл муус устар ыйыгар булуллубут, 53,83 карааттаах, 10,98 кыраам ыйааһыннаах, сырдык араҕас өҥнөөх,  ювелирнай хаачыстыбалаах бөдөҥ алмааска «Августина Николаевна Филиппова» ааты иҥэрдилэр. Алмаас иһигэр оруоса сибэкки курдук ойуулаах, онон бу ураты кэрэ таас диэн сыаналыыллар.

Августина Николаевна төрүт омуктар таҥастарын аныгылыы тыыннаан, тириини, түүлээҕи, туоһу, сиэли, сэлии муоһун туһанан, оҕуруонан дьэрэкээнник киэргэтэн, ураты уобарастары айбыта. Кини сахалыы, эбэҥкилии эрэ буолбакка, нуучча норуотун төрүт таҥаһын эмиэ тикпитэ. «Алмазы Якутии», «Мифы Якутии», «У Лукоморья», о.д.а. кэлиэксийэлэрэ өрөспүүбүлүкэ тас өттүгэр киэҥ биһирэбили ылбыттара.

Кини элбэх үөрэнээччилэрдээх, онон ылсыбыт дьыалата сайда-үүнэ турар.