Авиабилиэт атыылаһаары түөкүттэргэ түбэспит

Түөкүттэр күннэтэ араас албастары туһанан дьону албыннаан харчыларын суйдууллар. Билигин аны туристическай ааҕыныстыба, авиакасса үлэһиттэрэ буолан кубулунар буоллулар.

Дьон официальнай саайтынан туһанабыт дии санаан тус даннайдарын, баан реквизиттэрин түөкүттэргэ ыытар буоллулар диэн Ис дьыала  министиэристибэтин пресс-сулууспата суруйар.

Ол курдук Дьокуускай куорат олохтооҕо түөкүттэр  албыннарыгар итэҕэйэн, «Дьокуускай  — Санкт-Петербург – Дьокуускай» хайысхатынан билиэт атыылаһаары  20 тыһ. солк. уордарбыт.   Киниэхэ телеграмҥа авиахампаанньа үлэһитин аатыттан суруйан, чэпчэки сыаналаах билиэти атыылыыбыт диэбиттэр. Эмсэҕэлээччи итэҕэйэн билиэт харчытын ыыппыт, ол кэннэ түөкүттэр телеграмҥа кэпсэтиини барытын соппуттар уонна сибээскэ тахсыбатахтар.