Авиахампаанньа уонна авиалесоохрана холбоһуктаах эрчиллиилэрэ түмүктэнэн эрэллэр

“Полярнай авиалиниялар” уонна Саха сиринээҕи авиалесоохрана экипажтарын холбоһуктаах салгыҥҥа эрчилииллэрэ түмүктэнэн эрэллэр.

Тэрээһиннэр Маҕан сэлиэнньэтин аттыгар, ону тэҥэ авиахампаанньа Ньурбатааҕы уонна Баатаҕайдааҕы филиалларыгар буола тураллар.

Эрчиллиилэри төһө чуолкайдык толороллорун инструктордар кыраҕытык кэтииллэр – баһаарынай-десантниктар уонтан отут миэтэрэҕэ диэри үрдүктэн бөртөлүөттэн сиргэ түһэллэр. Десантниктар чуолкай, түргэн хамсаныыларыттан түһүү уонна уоту умуора охсуу  тутулуктаах.

Үгэс быһыытынан, уот умайа сытар сирдэригэр десаны түһэриигэр саамай опыттаах экипажтар кытталлар.

Ил Дархан Айсен Николаев эппитинэн, 2025 сылга авиалесоохрана икки саҥа салааны арыйыаҕа: Өлүөхүмэ улууһун Саҥыйахтаах  сэлиэнньэтигэр уонна Ленскэй оройуонун Витим бөһүөлэгэр. Онон Саха сиригэр авилесоохрана 23 салаата үлэлиэҕэ, диэн иһитиннэрэр “Полярные авиалинии” АУо пресс-сулууспата.