«Авиалесоохрана» инструктора Александр Краснов Өлүөхүмэҕэ баһаары кытта хайдах охсуһалларын кэпсээтэ

“Авиалесоохрана” хамаандата түҥ тайҕаҕа турбут уоту кытта эрэ охсуспат, нэһилиэнньэлээх пууннарга суоһаабыт уоттары умуруорууга эмиэ кыттыһар, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.  

Дьэ, манна кинилэр саамай сүрүн соруктара – минерализованнай балаһаттан, умайбат сирдэр кытыыларыттан саҕалаан, баһаарга утары уоту ыытыы.

“Биһиги наар тайҕаҕа, бадарааҥҥа үлэлиир буолбатахпыт. Нэһилиэнньэлээх пууннарга уот суоһаата да, онно барабыт. Утары уот ыытабыт, харабыллыыбыт. Биирдэ уот наһаа түргэнник кэлбитэ. Хата биир бырысыаканы, үрэхтэн тахсар ыллыгы булбуппут уонна ыллык кытыытынан умаппыппыт”, — диэн Өлүөхүмэ улууһун Кочегарово сэлиэнньэтин быыһааһыҥҥа сылдьыбыт Федеральнай  Авиалесоохрана десантнай-баһаарынай бөлөҕүн инструктора Александр Краснов кэпсээтэ.

Авиалесоохрана хамаандаларын Өргүөт, Быракаан, Белай Гора, Сайдыы, Куду Күөл, Киэҥ Күөл сэлиэнньэлэрин быыһыыр бөлөхтөргө киллэрбиттэрэ. Амфибия сөмөлүөттэр уу кутан, баһаары арыый тохтотор кэмнэригэр утары уоту ыытарга минерализованнай балаһаны хаһа охсорго наадалаахтар, диэн этэллэр Авиалесоохранаҕа.