«Азбука о важном» бырайыак көмөтүнэн оҕолор патриотизм тыыныгар иитиллиэхтэрэ

Саха сирин олохтоохторун оҕолорго аналлаах ураты Азбуканы оҥорорго кыттыҥ диэн ыҥыраллар. «Социальнай көҕүлээһиннэр сайдыыларын пуондата» кэммиэрчэскэйэ суох тэрилтэ «Азбука о важном» бырайыагы ыытар. 

Бырайыак улахан дьоҥҥо үйэлээх сыаннастары санатар уонна онно оҕолору тардар аналлаах. Төрөппүттэр оҕолоро үөрэниэхтээх кинигэлэрин бэйэлэрэ оҥорор кыахтаналлара улахан суолталаах.

«Кырдьыга да, биһиги оҕолор өйдөрүгэр-санааларыгар олус суолталаах, саамай судургу тыллары арыт умнар буоллубут. Ол иһин, өрөспүүбүлүкэ төрөппүттэрин «Азбука о важном» саҥа социальнай бырайыакка кыттаргытыгар ыҥырабын. Бастыҥ быһаарыылар, өйдөбүллэр ааптардара «Азбука о важном» кинигэ хаһаайыннарынан буолуохтара. Кинигэ интерактыыбынай сорудахтардаах дьэрэкээн буолуоҕа. Ону таһынан, бырайыак көмөтүнэн оҕолорго патриотизм тыына, бэйэ дойдутунан киэн туттуу үөскүөхтэрэ», -– диэн 23 нүөмэрдээх орто оскуола дириэктэрэ Георгий Афонскай иһитиннэрдэ.

Кыттааччылартан үлэлэри ыам ыйын 10 күнүгэр диэри ылаллар. Төрөөбүт дойдуга суолталаах саамай дьоһуннаах тыллары бырайыак саайтыгар анал форманы толорон ыытыахха сөп.