“Азия оҕолоро”  оонньууларга төһө бэлэммитий?

Ил Дархан Айсен Николаев  “Азия оҕолоро” норуоттар икки ардыларынааҕы VIlI оонньууларыгар  бэлэмнэниигэ уонна ыытыыга  тэрийэр кэмитиэт  мунньаҕын ыытта. Мунньахха инфраструктура эбийиэктэрэ төһө бэлэмнэрин  дьүүллэстилэр.

“Азия оҕолоро” Дьокуускайга 2024 сыл бэс ыйын 25 күнүттэн от ыйын 7 күнүгэр ыытыллыахтара. Оонньуулар Арассыыйаҕа олус улахан күрэхтэһиилэринэн буолуохтара, онуоха 25 дойдуттан кэлэн кытталлара былааннанар.

«Биллэн турар,  маннык таһымнаах түгэҥҥэ олохтоохтук бэлэмнэниэххэ наада. Боппуруостар бары, ол иһигэр тутууну, эбийиэктэри өрөмүөннээһини, тырааныспарынан хааччыйыыны, кыттааччылары олохтооһуну уонна аһатыыны, кинилэргэ  куттал суоһаабатын хааччыйыыны кытары сибээстээх боппуруостар, быһаарыллыахтаахтар”, — диэтэ Айсен Николаев.

Тэрийэр кэмитиэт мунньаҕар успуорт оонньууларыгар бэлэмнэниигэ суол каартатын оҥоруу туһунан отчуоттары иһиттилэр.

«Билигин оонньуулары ыытарга эбийиэктэр инфраструктураларын бэлэмнэнии былаана оҥоһуллан сөбүлэһилиннэ уонна толоруллар. Кыттааччылары аккредитациялааһын,  волонтердары үөрэтии кэнсиэпсийэтэ бигэргэтиигэ сылдьар”, — диэн бырабыыталыстыба бэрэссэдээтэлин солбуйааччы Сергей Местников иһитиннэрдэ.

Билигин Ил Дархан сорудаҕынан  тэрээһиннэргэ бэлэмнэнии чэрчитинэн, успуорт тутуулара, уопсай дьиэлэр уонна уопсастыбаннай миэстэлэр  өрөмүөннэнэллэр, ону тэҥэ Дьокуускай куорат суоллара саҥардыллаллар.  Хатас сэлиэнньэтигэр 2,3 кв.миэтэрэ иэннээх, 400 миэстэлээх, икки мэндиэмэннээх успуорт комплекса тутуллар.