«Азия оҕолоро»: эстэпиэтэни тэрийээччилэр бэлиэтэннилэр

Өрөспүүбүлүкэ отуттан тахса муниципальнай оройуонугар, куораттар уокуруктарыгар ыытыллыбыт «Азия оҕолоро» норуоттар икки ардыларынааҕы спортивнай оонньуулар уоттарын эстэпиэтэтигэр кулун тутар 19 күнүттэн бэс ыйын 26 күнүгэр диэри факелы тутан тиэрдээччи барыта 514 киһи,  974 волонтер кытынна.

Факеллаах уопсайа 37 тыһ. кв. тахса сири барбыттар. Санатан эттэххэ, эстэпиэтэ түмүктүүр түһүмэҕэр Дьокуускайга Ил Дархан Айсен Николаев «Азия оҕолоро» VIII спортивнай оонньуулар уоттарын — факелы бастакынан туппута.

Бүгүн эстэпиэтэни тэрийээччилэргэ махтал суруктары СӨ Бырабыыталыстыбатын Бэрэссэдээтэлин солбуйааччы — «Азия оҕолоро» VIII  спортивнай оонньуулары бэлэмнээһиҥҥэ уонна ыытыыга тэрийэр кэмитиэт бэрэссэдээтэлин солбуйааччы Сергей Местников уонна СӨ физическэй култууратын уонна успуордун миниистирэ Леонид Спиридонов туттардылар.

Сергей Местников бэлиэтээбитинэн, бу тэрээһин Саха сирин бары нэһилиэнньэтин түмпүт уонна оҕо-ыччат успуорда сайдарыгар уопсастыбаннас болҕомтотун өссө күүскэ тардыбыт.

«Факелы элбэх киһи тутар чиэскэ тигистэ. Олор ортолоругар Саха сирин эрэ буолбакка, дойду бүттүүнүн сайдыытыгар кылааттарын киллэрсибит дьоннор, ааттаах-суоллаах спортсменнар, култуура уонна уопсастыбаннас диэйэтэллэрэ бааллар. Эстэпиэтэ өрөспүүбүлүкэ бары нэһилиэнньэтин түмтэ. «Азия оҕолоро» уопсастыбаннаһы успуорт сайдыытын тиэмэтигэр уонна оонньууларга тарта. Биһиги маны барытын тэрийэн олоххо киллэрбит дьоммутугар махтанабыт«, — диэтэ Сергей Местников.

Леонид Спиридонов тэрээһин хас биирдии улууска уонна куорат уокуруктарыгар үрдүк таһымнаахтык ааспытын бэлиэтээтэ, ону көрөөччүлэр, эстэпиэтэ кыттыылаахтара туоһулуулларын эттэ.

«2023 сыл алтынньытыттан оробуочай хамыыһыйа үлэтэ саҕаламмыта. Тэрээһиннэр былааннара, улуустарынан эстэпиэтэ маршрута, тырааныспар, куттал суох буолуутун хааччыйыы боппуруостара бигэргэтиллибиттэрэ. Хас биирдии улуус сөбүлэһиигэ илии баттаабыта. Маннык улахан, далааһыннаах тэрээһиннэри бары көмөлөөн  бу курдук үрдүк таһымҥа өссө да ыытыахпыт диэн эрэнэбин«, — диир успуорт миниистирэ.

Санатан эттэххэ, «Азия оҕолоро» спортивнай оонньуулар уоттарын уматыы үөрүүлээх сиэрэ-туома тэрээһин саҕаланыа 100  хонук иннинэ, кулун тутар 19  күнүгэр, Хаҥаласка «Өлүөнэ очуостара» айылҕа пааркатыгар ыытыллыбыта.

РФ Бэрэсидьиэнэ Владимир Путин «Азия оҕолоро» спортивнай оонньуу үгэс курдук оҕо-ыччат успуордун сайдыытыгар, олимпийскай хамсааһын идиэйэлэрин киэҥник тарҕатыыга, араас дойду норуоттарын доҕордоһууларын бөҕөргөтүүгэ улахан суолталааҕын бэлиэтээн эппитэ.

Ил Дархан Айсен Николаев «Азия оҕолорун» арыллыытыгар, ирбэт тоҥҥо турар Дьокуускай оҕо аймах бырааһынньыгын, успуорду, доҕордоһууну, дьону-сэргэни уруйдуу-айхаллыы көрсөрүн бэлиэтээбитэ. Азия дойдуларын эдэркээн олохтоохторо саастарын тухары Саха сирэ бүттүүнэ ыалдьыттарга үөрүүнэн истиҥ иэйиини, тапталы, сылаас сыһыаны бэлэхтиирин дууһаларыгар угуттаан илдьэ сылдьыахтара диэбитэ бар дьоҥҥо туһаайан.

СӨ Ил Дарханын уонна Бырабыыталыстыбатын пресс-сулууспата