«Азия оҕолоро»: хайыһардьыппытыгар биир сөкүүндэ тиийбэтэ

Бүгүн Кемерово куоракка «Снежный» стадиоҥҥа уолаттарга 10 км хайыһарын сүүрүү буолла.

Манна бириистээх миэстэлэри Ураллааҕы федеральнай уокурук спортсменнара үллэһиннилэр: Тихон Кочергин, Никита Балабушко, Иван Курынов. Саха сирин хамаандатыттан Павел Сергеев биир сөкүүндэнэн хаалан, боруонса мэтээлтэн кыһыылаахтык матта.

Салгыы Павел спринт уонна эстафета көрүҥнэргэ кыттыаҕа.

Оттон сорох хайыһардьыттарбыт көрдөрүүлэрэ маннык буолла: Вадим Ширяев 21-с миэстэ, Николай Копырин 23-с миэстэ, Вадим Кривоногов 30-с миэстэ, Кирилл Гичка 35-с миэстэ уонна Николай Охлопков 40-с миэстэ.

Бүгүн күрэхтэһиигэ 14 мэтээл кэмпилиэгэ оонньонуоҕа: керлинг, фигурнай хаҥкылааһын, хайыһарынан сүүрүү, сноуборд, хоккей, шорт-трек, хайаттан хайыһарынан түһүү, трамплинтан ыстаныы, хаарга волейбол.

Оттон бэҕэһээ Саха сирин сүүмэрдэммит хамаандатын хапытаана Инна Рыбкина 5 килэмиэтиргэ хайыһарынан сүүрүүгэ 64 кыыстан бэһис кэлэри ситиһэн, эмиэ биир үчүгэй түмүгү көрдөрдө. Кини Уһук Илиҥҥи федеральнай уокурук чөмпүйүөнэ Виктория Илюшенкоттан 16 сөкүүндэнэн хаалла.

Оонньуулар кулун тутар 5 күнүгэр диэри ыытыллыахтара.

Евгений Горбачев хаартыскаҕа түһэриитэ.