Бүгүн, тохсунньу 22 күнүгэр Дьокуускайга «Азия оҕолоро» II норуоттар икки ардыларынааҕы кыһыҥҥы оонньуулар уоттарын эстафетата буолан ааста.
Бэҕэһээ Өлүөнэ очуостарын тэллэҕэр уматыллыбыт уоттаах капсуланы Петр Бекетов пааматынньыгар уоту араҥаччылааччылар – Кузбасс аатырбыт спортсменнара Никита Веселов, Илья Катышев, Денис Брит уонна Камолиддин Туракулов аҕаллылар.
Капсулалаах уоту факелга уматан эстафета быһыытынан көҥүл тустууга Олимпийскай оонньуулар чөмпүйүөннэрэ Павел Пинигин салайааччылаах биллэр-көстөр успуорт диэйэтэллэрэ уонна «Азия оҕолоро» оонньуулар ааспыт сыллардааҕы кыайыылаахтарын бөлөҕө тутан сүүрдэ. Ол курдук, Саха АССР физическэй култууратын уонна успуордун үтүөлээх үлэһитэ Михаил Друзьянов, «Азия оҕолоро» оонньуулар ууга харбааһыҥҥа призердара Владислав Адасько, АСАТУ физическэй иитиигэ уонна успуорка кафедратын сэбиэдиссэйэ Дмитрий Платонов, РФ биатлоҥҥа успуордун маастара Анюта Попова, Саха сирин хайыһарга үтүөлээх тириэнэрэ Петр Лукачевскай бу бөлөххө киирэн уоту арыаллыыр эстафетаҕа кытыннылар.
Итини таһынан эстафетаҕа хоккейга улаатан эрэр оҕолор ортолоругар кулуубунан хамаандаҕа аан дойду чөмпүйүөнэ Вадим Цыкунов, СӨ физическэй култууратын уонна успуордун үтүөлээх үлэһитэ Альберт Трофимов, РФ хайыһарынан сүүрүүгэ үс төгүллээх призера Дмитрий Егоров, «Азия оҕолоро-2022» оонньуулар сүүрүүгэ кыайыылаахтара Аксинья Панова кытыннылар.
Факелы Петр Бекетов пааматынньыгыттан саҕалаан Киров уулуссатынан «Эллэй Боотур» муус дыбарыаһыгар диэри аҕаллылар, барыта 2,1 км сүүрдүлэр. Ол кэннэ уот капсулаҕа угуллан Кемеровскай уобалас бэрэстэбиитэллэригэр туттарылынна.
Санатан эттэххэ, кыһыҥҥы оонньуулар Кемеровскай уобалас түөрт куоратыгар олунньу 23 – кулун тутар 5 күннэригэр ыытыллыахтара. Саха сирин сүүмэрдэммит хамаандатыгар 62 спортсмен киирэн дойдуларын чиэһин көмүскүөхтэрэ. Кинилэр 10 көрүҥтэн 6-гар – хайа хайыһарын уонна хаҥкы, хайыһарынан сүүрүү, сноуборд, фигурнай хаҥкы уонна хоккей көрүҥэр киирсиэхтэрэ.
Андрей Сорокин хаартыскалара.
Балаҕан ыйын 8 күнэ. Ил Дархан өрөспүүбүлүкэ олохтоохторун Арассыыйа норуоттарын тылларын күнүнэн эҕэрдэлээтэ. «Төрөөбүт тылларбытын…
Сунтаар улууһун олохтооҕо хат итирик туруктаах массыынаҕа олорон сууттанна. Бу туһунан СӨ Борокуратуурата иһитиннэрдэ. Ол…
Мэҥэ Хаҥалас улууһун кыһалҕатын уонна кэскилин туһунан "Саха сирэ - Дьоруойдар сирдэрэ" бырагыраама кыттыылаахтара биллилэр.…
Кэнники сылларга Дьокуускай куоракка араас кыылы-сүөлү, хара, кыһыл саһыллары, тыҥырахтаах көтөрү, тииҥи көрбүттэрин, ааҕааччыларбыт хаартыскалаан…
Арассыыйаҕа сылын ахсын ыытыллар «Мисс Россия 2025» куонкуруска 90 тыһыынчаттан тахса сайаапка киирбит диэн ТАСС…
Нам улууһугар хортуоппуй уонна оҕуруот аһын үүннэриитинэн дьарыктанар бааһынай хаһаайыстыбаларга уонна производственнай кооперативтарга билигин саамай…