«Азия оҕолоро» кыһыҥҥы иккис оонньуулар мэтээллэрин сүрэхтээтилэр

«Азия оҕолоро»  норуоттар икки ардыларынааҕы кыһыҥҥы II оонньууларга туттарыллар мэтээллэри Кемерово куоракка баар “Кузбасс” успуорт дыбарыаһыгар көрдөрдүлэр.

Алтантан кутуллубут мэтээллэр үс араас дуйдаахтар, төгүрүк быһыылаахтар. Ортотугар күрэхтэһии сүрүн бэлиэтэ лоппоҕор гына түһэриллибит, анныгар төгүрүгү тула ыытыллыбыт хайаҕастаах. Төгүрүччү Сhildren of Аsia, 2023, Кuzbass диэн суруллубут. Мэтээл кэннигэр тэрийэр кэмитиэт логотиба түһэриллибит.

Күрэхтэһии устата Кузбасска 57 кэмпилиэк наҕараада туттарыллыаҕа, мэтээл үксэ хаҥкылааһын көрүҥнэригэр оонньонуоҕа.