«Азия оҕолоро» күрэхтэһии 2024 сылга Дьокуускайга ыытыллыаҕа
14.12.2022, 19:31
Бөлөххө киир:
Ил Дархан Айсен Николаев уонна РФ Олимпиадатын кэмитиэтин бэрэсидьиэнэ Станислав Поздняков көрсөн, Саха сиригэр успуорт национальнай көрүҥнэрин сайыннарыы, оҕо, ыччат успуордугар саҥа форматтары киллэрии, чуолаан аан дойдутааҕы «Азия оҕолоро» оонньуу тустарынан кэпсэттилэр, быһаарыстылар.
Санатар буоллахха, быйылгы оонньуу Владивосток куоракка Саха сирин өйөбүлүнэн үрдүк таһымнаахтык ыытыллыбыта. Тэрээһиҥҥэ Азия 12 дойдутуттан 20 хамаанда уонна Арассыыйа эрэгийиэннэриттэн 9 хамаанда кыттан, барыта 1307 спортсмен күрэхтэспитэ. «Азия оҕолоро» күрэхтэһии 2024 сылга Дьокуускай куоракка ыытыллыаҕа.
Айсен Николаев көрсүһүүгэ улахан тэрээһиҥҥэ бэлэмнэнии саҕаламмытын туһунан иһитиннэрдэ. «Оонньууну тэрийиигэ бэлэмнэнии саҕаланна. Бары хайысхаларга хамыыһыйалары тэрийбиппит. Билигин Дьокуускай куоракка икки спортивнай комплексы тутууга федеральнай үбү көрөргө боппуруос быһаарылла сылдьар. Бу күрэхтэһии үрдүк таһымнаахтык ыытыллыахтаах», – диэн Айсен Сергеевич эттэ.
Олимпиада кэмитиэтин бэрэсидьиэнэ Станислав Поздняков аан дойдутааҕы олимпиада хамсааһыныгар Азия дойдуларын кытта бииргэ үлэлээһиҥҥэ улахан болҕомто уурулларынан ол таһымын үрдэтиигэ «Азия оҕолоро» күрэхтэһии оруола улаханын бэлиэтээн эттэ.
Санатар буоллахха, VIII «Азия оҕолоро» күрэхтэһии 2024 сылга бэс ыйын 25 — от ыйын 7 күннэригэр ыытыллыаҕа. Барыта 3000 кэриҥэ спортсмен кыттыаҕа, 17 сайыҥҥы успуорт көрүҥэр күрэхтэһиэхтэрэ. Ону тэҥэ, II кыһыҥҥы «Азия оҕолоро» күрэхтэһии эһиил Кузбасска олунньу 23 — кулун тутар 5 күннэригэр ыытыллыаҕа. Билиҥҥи туругунан Азияттан 6 дойду, Арассыыйаттан 8 эрэгийиэн кытталларын биллэрбиттэр.
+1
+1
+1
+1
+1
+1
+1
Сообщить об опечатке
Текст, который будет отправлен нашим редакторам: