«Азия оҕолоро»: москвалар бастаан иһэллэр

Бу күннэргэ Кемеровскай уобаласка норуоттар икки ардыларынааҕы «Азия оҕолоро» кыһыҥҥы спортивнай иккис оонньуулар буола тураллар. 12 омук дойдутуттан уонна Арассыыйа араас эрэгийиэннэриттэн кэлбит 846 эдэр спортсмен успуорт уон көрүҥэр күрэхтэһэ сылдьаллар.

Билиҥҥи туругунан, барыта 15 мэтээллээх — 9 кыһыл көмүс, 2 үрүҥ көмүс уонна 4 боруонса мэтээллээх Москва хамаандата уопсай суокка инники сылдьар. Иккис кэккэҕэ Ураллааҕы федеральнай уокурук (10 мэтээллээх) уонна үһүс кэккэҕэ Уһук Илиҥҥи федеральнай уокурук (8 мэтээллээх) сылдьаллар.

Оттон Саха сирин сүүмэрдэммит хамаандата билиҥҥитэ биир боруонса мэтээллээх. Сноуборд көрүҥэр Илья Соколов үһүс буолары ситиспитэ.

Бүгүн, кулун тутар 1 күнүгэр, оонньуулар саҕаламмыттара бэһис күнэ буолла. Керлинг, хаҥкылаан сүүрүү, сноуборд, хоккей, хайыһар, шорт-трек, хайаттан хайыһарынан түһүү, хаарга волейбол көрүҥнэригэр илин-кэлин түсүһүөхтэрэ. Онон оҕолорбутуттан сэмээр ситиһиилэри күүтэбит.

Санатан суруйдахха, «Азия оҕолоро» кыһыҥҥы иккис оонньуулара Кемеровскай уобаласка — Кемеровоҕа, Новокузнецкайга, Междуреченскайга, Таштаголга уонна Шерегешкэ олунньу 23 күнүттэн кулун тутар 5 күнүгэр диэри ыытылла тураллар.

Александр Лукин хаартыскаҕа түһэриилэрэ,

«Азия оҕолоро» оонньуулар пресс-кииниттэн.