“Азия оҕолоро” норуоттар икки ардыларынааҕы VIII спортивнай оонньууларга бэлэмнэнии бүтэһик түһүмэҕэр сылдьар

Бу күннэргэ Үөрэх уонна билим миниистирэ, “Азия оҕолоро” норуоттар икки ардыларынааҕы VIII спортивнай оонньууларга кыттааччылары түһэриигэ эппиэттээх хамыыһыйа бэрэссэдээтэлэ Нюргуна Соколова тэрээһин кыттыылаахтарын олохтооһун миэстэлэрин көрдө.

Үөрэх уонна билим министиэристибэтэ кыттааччылары түһэрии боппуруоһунан көхтөөхтүк дьарыктанар. Маныаха анаан Үөрэх судаарыстыбаннай тэрилтэлэрэ  бэйэлэрин уопсайдарын бэлэмнииллэр.

Дьону түһэрэр испииһэккэ барыта 27 эбийиэк киирбитэ, итинтэн:

1. М.К. Аммосов аатынан Хотугулуу-Илиҥҥи федеральнай университет 7 эбийиэгэр (спортсменнар дэриэбинэлэрэ) спортсменнар, волонтердар дэлэгээссийэлэрэ уонна өҥө оҥорор этэрээт киириэҕэ.
2. 8 гостиницаҕа уонна отельга дьүүллүүр сүбэ, бочуоттаах ыалдьыттар, сонуну киэҥник тарҕатар ситим бэрэстэбиитэллэрэ түһүөхтэрэ.
3. Үөрэх уонна билим, Успуорт, Үлэ уонна социальнай сайдыы министиэристибэлэрин 12 судаарыстыбаннай тэрилтэтигэр култуура бырагырааматын, быраабы араҥаччылыыр, дьүүллүүр сүбэ уонна успорт дэлэгээссийэтин бэрэстэбиитэллэрэ олоруохтара.

Күн бүгүн дьиэлэр эркиннэрин өрөмүөнэ бүтэн эрэр, ону тэҥэ, эбийиэктэр баар сирдэригэр куттал суох буолуутун хааччыйарга бэлэмнэнэллэр. Ооонньуу кэмигэр өҥө үрдүк таһымҥа барарын уонна куттала суох буоларын инниттэн тэрээһин кыттыылаахтарын аккредитациялыыллар, анал бэрэбиэркэни ааһаллар.

“Азия оҕолоро” норуоттар икки ардыларынааҕы VIII спортивнай оонньуулар араас эрэгийиэннэр уонна дойдулар эдэр спортсменнарын сомоҕолуур чаҕылхай тэрээһининэн буолуоҕа. Бу туһунан Үөрэх уонна билим министиэристибэтин телеграм ханаалыгар сырдаталлар.