CИА хаартыската
Бүгүн, от ыйын 5 күнүгэр, хапсаҕайга, курашка, буоксаҕа, волейболга уонна үрдүккэ хатаастан тахсыыга (скалолазание) бастыҥнары быһаардылар.
Хапсаҕайга түмүктүүр киирсиилэргэ 11 хамаандаттан 45 спортсмен биэс ыйааһыҥҥа кытынна. Саха сирин сүүмэрдэммит хамаандата алта мэтээллэннэ. Сандал Алексеев (50 кг) уонна Олег Кононов (55 кг) кыһыл көмүс мэтээллэри ыллылар. Үрүҥ көмүһү Данил Сивцев (55 кг), Эйнар Максимов (62 кг), боруонсаны Ильдар Птицын (50 кг), Айхаан Кривошапкин (62 үөһээ кг. ) ыллылар. Маны сэргэ, кыһыл көмүс мэтээлгэ Тыва уонна Монголия бөҕөстөрө тигистилэр.
Курашка Саха сирин эдэр спортсменнара түөрт мэтээллэннилэр. Ол иһигэр биир кыһыл көмүһү Карина Сикалиева (44 кг), икки үрүҥ көмүһү Евгения Чесебиева (57 кг), Георгий Чевадзе (83 кг), боруонсаны Вероника Нестерева (57 кг) ыллылар.
Хамаанданан зачекка Узбекистан, Саха Өрөспүүбүлүкэтэ, Казахстан үчүгэй көрдөрүүлэннилэр.
Саха сирин спортсмена Айсен Неустроев буоксаҕа VIII «Азия оҕолорун» чөмпүйүөнүнэн буолла. Бастакы хамаанда спортсмена 52 диэри кг ыйааһыҥҥа Казахстан спортсменын Темирхан Жолмаханы кытары күөн көрүстэ.
Боруонсаны Саха сирин спортсменнара Виктор Захаров (46 кг), Артур Севергин (52 кг), Данил Сафонов (70 кг), Алина Аммосова (54 кг), Саяна Горохова (46 кг) ыллылар.
Атын күрэхтэһиилэргэ кыайыылаахтарынан Робия Равшанова (Узбекистан, 50 кг), Чон Ун Ген (КНДР, 52 кг), Кира Трунина (Урал ФУо, 57 кг), Элер Рустамов (Узбекистан, 48 кг), Жахоннгир Зайнидинов (Узбекистан, 57 кг), Мухаммадкодир Абдуманабов (Кыргызстан, 63 кг), Диербек Муродиллаев (Узбекистан, 70 кг), Владимир Дранько (Уһук Илин ФУо., 80 кг) таҕыстылар.
«Дохсун» успуорт комплексыгар үөһээ хатаастыыга (скалолазание) күрэхтэстилэр. Кыһыл көмүс мэтээли Сибиир ФУо. спортсменнара Мария Силкина уонна Роман Прусаков ыллылар.
Бүгүн уолаттар волейболга полуфиналга кииристилэр. Күрэхтэһии түмүгүнэн сарсын кыһыл көмүс иһин Беларусь Өрөспүүбүлүкэтин уонна Сибиир ФУо. сүүмэрдэммит хамаандалара күрэхтэһиэхтэрэ. Боруонса иһин Казахстан уонна Узбекистан хаимаандалара күөн көрсүөхтэрэ.
Кыргыттарга бастыыр иһин Беларусь Өрөспүүбүлүкэтин уонна Урал ФУо. хамаандалара, үһүс миэстэҕэ тахсар иһин Узбекистан уонна Сибиир ФУо хамаандалара күрэхтэһиэхтэрэ.
Сиһилии:https://yakutsk2024.org/#news.
СӨ Ил Дарханын уонна Бырабыыталыстыбатын пресс-сулууспата
Арассыыйа олохтоохторо 2026 сылга мунньуллар биэнсийэлэриттэн 440 тыһыынча солкуобайы биир кэмнээхтик ылыахтарын сөп диэн РИА…
Дьокуускайга өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһин пленарнай мунньаҕын улуустартан уонна нэһилиэктэртэн кэлбит…
Киин куоракка икки күн устата өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһэ үгүс дьокутааты…
Ил Дархан туһаайан этиитигэр дьоҕус урбааны өйүүр боппуруоска болҕомтотун ууруо диэн, норуот дьокутаата, Ил Түмэн…
“Илии сылааһа” сыах (сал. Саввина И.Е.) филиала Куокуйдааҕы “Надежда” холбоһук (сал. Еремеева Т.У.) бу сылга…
Дьокуускайдааҕы полиция 1-кы №-дээх отделын дьуһуурунай чааһыгар олохтоох дьахтар кини аатыгар сокуоннайа суохтук 145 тыһ.солк.…