«Азия оҕолоро» оонньуу аһыллыыта үс омук тылынан ыытыллыаҕа

Быйыл  VIII-с  «Азия оҕолоро»норуоттар икки ардыларынааҕы успуорт оонньууларын аһыллыытын сиэрэ-туома үс омук тылынан тэриллэн ыытыллыаҕа: нууччалыы, сахалыы уонна эбэҥкилии.

Сүрүн оруоллары сэттэ оҕо оонньуоҕа. Соторутааҕыта Дьокуускайга П.А. Ойуунускай аатынан Саха тыйаатырыгар  театрализованнай туруоруу репетицията буолан ааспыта.

«Биһиги дойдубут Арктикатыгар араас омук норуота олорорун көрдөрүөхпүт. Сэттэ омук норуоттарын оҕото, ол иһигэр нуучча, саха, татаар уонна эбэҥки омуга буоланнар Арктика айылҕатын дьикти көстүүлэринэн айанныахтара», — диэн кэпсээтэ оонньуу аһыллыытын сиэрин-туомун туруорааччы, режиссер Руслан Тараховскай.

Оонньуу аһыллыытын сценарийа саха төрүт үгэстэригэр олоҕурар. Сүрүн көрдөрүүлэр Арктика дьикти айылҕатыгар тирэҕирэллэр. Аһыллыы сиэрин-туомун тэрээһинигэр Саха сирин 24 улууһуттан улахан дьону киллэрэн туран, 4 тыһ. кэриҥэ киһи кыттара күүтүллэр.

Ил Дархан Айсен Николаев «Азия оҕолоро» успуорт оонньуулара быйыл дойду үрдүнэн  биир улахан күрэхтэһиитэ буоларын уонна үрдүк таһымҥа ыытылларын бэлиэтээбитэ..

«Азия оҕолоро» норуоттар икки ардыларынааҕы успуорт оонньуулара бэс ыйын 25 күнүттэн от ыйын 7 күнүгэр диэри Дьокуускай куоракка ыытыллыахтара.