«Азия оҕолоро» оонньуу аһыллыытыгар Евгений Плющенко уонна Александра Трусова кыттыахтара

Арассыыйаҕа хаҥкыга аатырбыт спортсменнар Евгений Плющенко уонна Александра Трусова “Азия оҕолорун” оонньуутун аһыллыытыгар кыттыыны ылыахтара.

“Азия оҕолоро” норуоттар икки ардыларынааҕы успуорт оонньуутун аһар тэрээһин олунньу 25 күнүгэр Кемеров куорат “Кузбасс” муус дыбарыаһыгар буолуоҕа.

Кыттааччылар олунньу 23 күнүттэн кулун тутар 5 күнүгэр диэри Кемеров куоракка күрэхтэһиэхтэрэ. Күрэхтэһии бырагырааматыгар хайыһар, шорт-трек, хоккей, сноуборд, хайа хайыһара, фигурнай хаҥкылааһын, хайыһарынан трамплинтан ыстаныы киирдилэр. Ону таһынан күрэхтэһиини ыытар куорат туруорсуутунан “Азия оҕолоро” кыһыҥҥы күрэхтэһиитигэр керлинг, фристайл, хаҥкынан сырсыы успуорт көрүҥнэрэ бастакытын киирдилэр.

Оонньуулар өссө биир уратыларынан хаарга волейбол уонна киберспорт көрүҥнэрэ күрэхтэһии бырагырааматын таһынан көрдөрүөхтэрэ. Бу кэнниттэн ыытыллар “Азия оҕолоро” сайыҥҥы оонньуулара 2024 сылга Дьокуускайга буолуоҕа.

Хаартыска:  https://kuzbass-2023.ru/