«Азия оҕолоро» оонньуу сабыллыытыгар Niletto кыттыаҕа

Николай Тарскай аатынан «Туймаада» стадиоҥҥа  «Азия оҕолоро» норуоттар икки ардыларынааҕы VIII спортивнай оонньуулар сабыыллыытын сиэрэ-туома от ыйын 6 күнүгэр ыытыллыаҕа.

Шоу сүрүн чааһыгар «Любимка» хит ырыа ааптара, Арассыыйа биллиилээх ырыаһыта Niletto кыттыаҕа. Бу туһунан Саха сирин Ил Дарханын уонна Бырабыыталыстыбатын пресс-сулууспата иһитиннэрдэ.

Тэрээһин тиэмэтэ — «Биһиги  -Азия оҕолоробут! Биһиги — Күн оҕолоробут!». Тэрийээччилэр этэллэринэн, киэҥ далааһыннаах туруоруу көрөөччүлэри  ураты эниэргийэлээх Саха сирин эйгэтигэр угуйуоҕа. Музыкальнай бырайыакка биллиилээх артыыстар уонна музыканнар, композитордар, диджейдэр уонна хореографическай кэлэктииптэр кыттыыны ылыахтара. Билиэттэри онлайн «Азия оҕолоро» саайтка уонна «Центральнай» киинэ тыйаатырын кассатыгар атыылаһыахха сөп.

Арассыыйа Бэрэсидьиэнэ Владимир Путин «Азия оҕолоро»  оонньууларын оҕо-ыччат успуордун эйгэтигэр биир саамай интэриэһинэй уонна ситиһиилээх бырайыагынан ааттаабыта. Ил Дархан  Айсен Николаев «Азия оҕолоро» норуоттар икки ардыларынааҕы успуорт оонньуулара бу сылга аан дойду үрдүнэн оҕолорго биир улахан күрэхтэһиилэринэн уонна саамай үрдүк таһымҥа ыытыллалларын бэлиэтээбитэ.