«Азия оҕолоро» оонньуулар Уота Муоматтан Өймөкөөҥҥө айаннаата

Ыам ыйын 15 күнүгэр, сэрдэҕэ, «Азия оҕолоро» оонньуулар Уотун эстэпиэтэтин Муома  улууһугар көрүстүлэр.

Норуоттар икки ардыларынааҕы VIII спортивнай оонньуулар символларын — умайа сылдьар факеллаах  Уоту улуус киинэ Хонуу уулуссаларыгар тахсан, оройуон бастыҥ спортсменнара көрүстүлэр.

Бу иннинэ спортивнай оонньуулар бэлиэ символларын Саха сирин 21 улууһугар көрсүбүттэрэ. Эстэпиэтэ   устата — 37 тыһыынча км.  Тэрээһиҥҥэ 285  Уоту арыаллааччы уонна 560 волонтер кыттыыны ылла. Салгыы Норуоттар икки ардыларынааҕы «Азия оҕолоро»  VIII оонньуулар Уота Өймөкөөн улууһугар айаннаата. Тымныы полюһугар спортивнай оонньуулар символларын бээтинсэҕэ, ыам ыйын 17 күнүгэр, Өймөкөөн улууһун киинигэр Уус-Ньараҕа уруйдуу-айхаллыы көрсүөхтэрэ.