«Азия оҕолоро» оонньууларга 3,6 тыһ. киһи волонтер буолуон баҕарар

Бу сайын Дьокуускайга ыытыллар «Азия оҕолоро» норуоттар икки ардыларынааҕы спортивнай оонньууларга 3,6 тыһ. киһи волонтер буолуон баҕарар. Волонтер буоларга сайаапканы биэрии бүтэрэ үс күн хаалла.

Дойду бэрэсидьиэнэ Владимир Путин бу оонньуулары оҕо успуордун бастыҥ бырайыагынан, талааннаах оҕолор Арассыыйа араас эрэгийиэннэриттэн уонна кэккэ Азия дойдуларыттан түмсэр былаһаакката ааттаабыта. Онтон Саха сирин баһылыга Айсен Николаев «Азия оҕолоро» өрөспүүбүлүкэ брендэ буоларын бэлиэтээн эппитэ.

«Бу оонньууларга волонтер буолуон баҕалаахтартан 3,6 тыһ. тахса сайаапка киирдэ. Оонньуулар ыытыллар кэмнэригэр 16 туолбут уонна аҕа саастаахтар волонтер буолуохтарын сөп. Кинилэргэ босхо аһылык, олоруу, сувенир, экипировка, анал үөрэх көрүллэр. Билигин регистрация, тестирование ыытыллар. Сайаапканы ылыы 2024 сыл олунньу 1 күнүгэр түмүктэнэр», — диэн өрөспүүбүлүкэ волонтердары кытта үлэҕэ киинин дириэктэрин солбуйааччы Евгений Амбросьев.

Сайаапканы маннык сигэнэн биэриҥ: yakutsk2024.org.