«Азия оҕолоро» оонньууларга бэлэмнэнии мунньаҕын Юрий Трутнев ыытта

«Азия оҕолоро» норуоттар икки ардыларынааҕы VIII төгүлүн ыытыллар  оонньууларга бэлэмнэнии үлэтигэр туһуламмыт тэрийэр кэмитиэт мунньаҕын РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев ыытта.

Санатар буоллахха, РФ Бэрэсидьиэнэ Владимир Путин «Азия оҕолоро» Арассыыйа эрэгийиэннэриттэн, Азия дойдуларыттан талааннаах, дьоҕурдаах оҕолору түмэр успуорт эйгэтигэр биир саамай сэргэх, интэриэһинэй бырайыак буоларын бэлиэтээбитэ.

“Бу сыл от ыйыгар Дьокуускайга норуоттар икки ардыларынааҕы «Азия оҕолоро» оонньуулары ыытабыт. Бу 3 тыһыынча кэриҥэ эдэр спортсменнары түмэр аан дойдутааҕы таһымнаах тэрээһин. Маннык элбэх тас дойду кыттыылаах бөдөҥ успуорт тэрээһиннэрэ ураты суолталаахтар, онон успуорду сайыннарар саҥа структуралары тэрийии ирдэнэр”, — диэн  Юрий Трутнев мунньаҕы аста.

Ил Дархан Айсен Николаев бүгүҥҥү күн сүрүн сыалынан күрэхтэһии ыытыллар эбийиэктэрин бэлэмнээһин буоларын бэлиэтээн эттэ. Күрэхтэһиилэр 16 успуорт эбийиэгэр ыытыллыахтара, оттон 13 эбийиэк хамаандалар эрчиллэллэригэр анаммыт. Бүгүн биир эбийиэк тутулла турар, 11 эбийиэккэ өрөмүөн үлэтэ бара турар. Сүрүн үлэлэр муус устарга түмүктэниэхтээхтэр, ол кэнниттэн сылаас кэмҥэ ыытыллар кыра үлэлэр ордон хаалаллар. Ыам ыйыгар бары эбийиэктэр олоччу бэлэм буолаллара былааннаммыт.

Волонтердары талыы үлэ көхтөөхтүк бара турар. Арассыыйа эрэгийиэннэриттэн уонна тас дойдулартан волонтердааһыҥҥа сайаапкалар киирэ тураллар. Билигин 5 тыһыынча кэриҥэ сайаапка киирбит, олортон 1,9 тыһыынча киһи талыллан ылан 20 хайысхаҕа көмө үлэтигэр кыттыахтара.