“Азия оҕолоро” оонньууларга биир сүрүн эппиэтинэһи ХИФУ сүгэр

4800 тахса ыалдьыты түһэрэр, хоннорор, аһатар, сынньалаҥын тэрийэр, манан аҕай дьыала буолбатах. Онон “Азия оҕолоро” оонньууларга биир сүрүн эппиэтинэһи сүгэрин быһыытынан ХИФУ салалтата быстах кэмҥэ үлэлиир 240 үлэһиттээх Спортсменнар дэриэбинэлэрин мэриятын тэрийбитэ. Мэринэн Павлов Степан Ильич үлэлиир.

“Федеральнай бүддьүөттэн 161 мөл. солк. ылбыппыт, бу харчыга 18, 20, 7/1,7/2, №№-дээх уопсай дьиэлэри өрөмүөннээтибит. Былырыын сорох уопсайдары өрөмүөннээбиппит, олору быйыл бэйэбит күүспүтүнэн сууйан-сотон биэрдибит. Сүрүннээн икки хамыыһыйа эбийиэктэрбитин тутта. Куттал суох буолуутун хааччыйар хамыыһыйаны ааспыппыт, аахтаны тутан олоробут. Билигин Роспотребнадзор хамыыһыйатын кэтэһэ сылдьабыт, эбийиэкпит аҥаарын туппута, сорохторун бүгүн тутарыгар эрэллээхпит”, — диэн кэпсээтэ мэр Степан Ильич.

Уопсайдарга ыалдьыттары кэтэһэн олороллор. Секция улахан хоһугар үстүү, кыратыгар иккилии буолан олоруохтара. Хас биирдиилэригэр орон, туумба, уопсай остуол, устууллар, ыскаап баар. Ороннорун таҥаһа кытта бэлэмнэммит.

Ыалдьыттар, спортсменнар доруобуйалара кыраҕы харахха ылылла сылдьаллар. Ол курдук “Азия оҕолоро” оонньуулар дирекциялара мэдиссиинискэй тэрилтэлэри кытта бэйэтэ туспа дуогабардаһан, бэҕэһээ 1 №-дээх поликлиника үлэһиттэрэ 18 №-дээх уонна 19 №-дээх куорпустарга үлэлии олороллор.

Волонтердар хас биирдии делегацияны аэропортан саҕалаан, түһэр нүөмэрдэригэр тиийэ арыаллыахтара.

Билиҥҥитэ манна чуумпу, сотору кэминэн күргүөм күүрээннээх олох оргуйа түһэригэр эрэллээхпит.