“Азия оҕолоро” оонньууларга Москва сүүмэрдэммит хамаандатыгар – Саха сирин оҕото

“Азия оҕолоро” норуоттар икки ардыларынааҕы VIII спортивнай оонньууларга остуол тиэнньиһигэр Москва хамаандатыгар киирэн, Саха сириттэн төрүттээх оҕо кэлэн кытта сылдьар.

Остуол тиэнньиһигэр Саха сирин оҕолорго хамаандатын сүрүн тириэньэрэ Аркадий Иванов көмөтүнэн Изот Кривошапкины кытта кылгастык кэпсэтэн ааһар түгэн тосхойдо.

— Чурапчы улууһун Хатылы нэһилиэгиттэн төрүттээхпин. Остуол тиэнньиһинэн биэс сааспыттан оонньуубун. Нэһилиэк саалатыгар тиэнньис остуола баара. Онно тиийэн аҕам Геннадий Изотович Кривошапкин салайыытынан убайбын, доҕотторбун кытта тиэнньистиирбит. Куоракка киирэн араас күрэхтэһиилэргэ кыттан миэстэлэһэрим, бастыырым.

Икки сыл анараа өттүгэр Москва тириэньэрдэрэ бэлиэтии көрөн ыҥырбыттара. Билигин Москва 1-кы нүөмэрдээх Олимпийскай эрэл училищетыгар үөрэнэбин. Күҥҥэ иккитэ дьарыктанабыт. Сарсыарда 7 ч. сэрээккэ, 8-11:30 ч. диэри дьарык, онтон 12-16:30 ч. диэри үөрэнэбит уонна 17-19 ч. киэһээҥҥи дьарык буолар. Субуотаҕа биир дьарык, өрөбүлгэ – сынньалаҥ.

Маҥнай тиийэн баран нууччалыы үчүгэйдик саҥарбат буолан син ыарырҕаппытым. Билигин үчүгэй. Москва хамаандатыгар түөрт оҕо, икки тириэньэр буолан кэллибит. Манна кэлэн оонньоон иккитэ кыайдым, — диэн кылгастык санаатын үллэстэр.

Санатан эттэххэ, Изот быйыл саас ыытыллыбыт Арассыыйаҕа остуол тиэнньиһигэр хамаанданан үһүс,  биирдиилээн бастыыр иһин күрэхтэһиигэ үһүс, пааранан бастакы миэстэлэри ылары ситиспитэ. Онон Саха сирин успуорду сэҥээрээччилэри соһутан, үөрдэн турар. Бу ыытылла турар “Азия оҕолоро” оонньууларга биир дойдулаахпытыгар ситиһиилэри баҕарабыт.