«АЗИЯ ОҔОЛОРО»: Саха сирин кикбоксердара түөрт кыһыл көмүс мэтээли ыллылар

«Сулус» успуорт уораҕайыгар «Азия оҕолоро» норуоттар икки ардыларынааҕы оонньууларга кикбоксиҥҥа финальнай киирсиилэр түмүктэннилэр.

Саха сирин сүүмэрдэммит хамаандата түөрт кыһыл, икки боруонса уонна түөрт үрүҥ көмүс мэтээллэри ылары ситистилэр.  Саха сирин  хамаандата кикбоксиҥҥа саамай элбэх кыһыл көмүс мэтээли хомуйда. Финальнай киирсиилэргэ саха спортсменнара Урал уонна Сибиир федеральнай уокуруктарын кикбоксердарын кытта кииристилэр. Күрэхтэһиилэр 45 киилэттэн 63, 5 кг диэри ыйааһыннаахтарга ыытылыннылар. Кыайыылаахтарынан  Аман Иванов (45 кг), Ярослав Габышев (51 кг), Айаал Поскачин (54 кг), Николай Слепцов (63 кг) буоллулар. 48 кг диэри, 57 кг, 60 кг  ыйааһыннаахтарга Сибиирдээҕи федеральнай уокурук спорстменнара Кежик Шактар-Оол, Матвей Лобач  уонна Баткар Могедир кыһыл көмүс мэтээл хаһаайыннарынан буоллулар.

16 саастаах эдэр спортсмен Ярослав Габышев кыайыытын олохтон туораабыт тириэньэригэр анаата. «Мин кыайыыбын олохтон туораабыт тириэньэрбэр Дмитрий Алексеевка аныыбын. Кыайыыны ситиһиэм диэн бигэ эрэллээх этим. 3:0 ахсаанынан кыайдым.  Намнааҕы педагогическай кэллиэскэ үөрэнэбин», — диэн «Азия оҕолоро» оонньуу чөмпүйүөнэ санаатын үллэһиннэ.

Итини кытта кикбоксер Николай Слепцов Урал федеральнай уокурук спортсменын кытта күөн көрсүүгэ эмиэ кыайыыны ситистэ. «Кыһыл көмүс мэтээли төрөөбүт дойдубар, тириэньэрдэрбэр уонна мин доҕотторбор аныыбын. Былаан быһыытынан кииристим, күрэхтэһиигэ биир сыл бэлэмнэммитим. «Азия оҕолоро» оонньуу олус үчүгэйдик ааста. Кикбоксин успуорт көрүҥүнэ үс сыл дьарыктанабын, успуорка миигин доҕорум аҕалбыта. Утарылаһааччыбар сынньалаҥ биэрбэккэ кыайыыны ситистим. Кини миигиттэн быдан үрдүк уҥуохтаах этэ», — диэтэ Николай Слепцов.