«Азия оҕолоро»: спортсменнар уон көрүҥҥэ күөн көрсөллөр

«Азия оҕолоругар» күрэхтэһии төрдүс күнүгэр, эдэр спортсменнар уон көрүҥҥэ күөн көрсөллөр.

Бүгүн, бэс ыйын 29 күнүгэр, успуорт аренатыгар спортсменнар стритболга, мас-рестлиҥҥэ, художественнай гимнастикаҕа, волейболга, мини-футболга, ууну харбааһыҥҥа, спортивной тустууга, шахмакка, Го оонньуутугар уонна остуол тенниһигэр илин-кэлин түсүһэллэр.

Санатар буоллахха, «Азия оҕолоро» норуоттар икки ардыларынааҕы VIII төгүлүн ыытыллар спортивнай оонньуулар Дьокуускайга бэс ыйын 26 күнүттэн от ыйын 7 күнүгэр диэри ыытыллаллар. Манна 24 дойдуттан барыта 30 хамаанда киирсэр. Бырагыраамаҕа успуорт 24 көрүҥэ киирэн турар.

Норуоттар икки ардыларынааҕы «Азия оҕолоро» спортивнай оонньуулар кыттыылаахтарыгар туһаайан этэригэр, РФ Бэрэсидьиэнэ Владимир Путин  оҕо-ыччат успуордун сайдыытыгар, олимпийскай хамсааһын идиэйэлэрин киэҥник тарҕатыыга, норуоттар доҕордоһууларын бөҕөргөтүүгэ үгэс курдук улахан суолталаах кылааттарын киллэрэллэрин бэлиэтээбитэ.

СӨ Ил Дархана Айсен Николаев «Азия оҕолоро» 2024 сыллаахха дойду сиригэр-уотугар биир улахан күрэхтэһиинэн буоларын уонна үрдүк таһымҥа ыытылларын бэлиэтээн турар.

СӨ Ил Дарханын уонна СӨ Бырабыыталыстыбатын пресс-сулууспата