«Азия оҕолоро»: Таиланд хайыһардьыта хаары бастакытын көрдө

Бу күннэргэ Кемеровскай уобаласка «Азия оҕолоро» спортивнай кыһыҥҥы иккис оонньуулар буола тураллар. Уобалас Междуреченскай куоратыгар баар Югус хайатыгар хайыһарынан түһүү көрүҥэ ыытылынна. Манна отуттан тахса кыыс күрэхтэстэ. 

Араас таһымнаах, дьарыктаах кыргыттар быыстарыгар Таиланд королевствотыттан сылдьар Типкерсон Пхичаяпорн (Thipkerson Phichayaporn) баар. Кини хайыһарынан үрдүк хайаттан бастакытын түспүтүн ааһан, хаары дьэ көрбүт эбит.

Ол туһунан кини маннык кэпсээтэ:

— Югус хайаттан түһэр тыраассаны сөбүлээтим, ол эрээри олус ыарахан эбит. Мин маннык хайаттан бастакыбын хайыһарынан түстүм. Иккис көрдөрүүбүтүн түһээри сырыттахпытына олох даҕаны хаардаата, тыалырда. Атын кыргыттар маннык күҥҥэ-дьылга үөрүйэх буоллахтарына, бу миэхэ олус мэһэйдээтэ. Мин төрөөбүт дойдубар буолбакка, Турцияҕа тиийэн дьарыктанабын. Онно оҥоһуу хаар баар, онон дьиҥнээх хаары Арассыыйаҕа кэлэн көрдүм, астынным. 

Манна эбэн кини тириэньэрэ: «Арассыыйаҕа кэлэн уопут эбиннибит, атын дойду спортсменнарын кытта бодорустубут. Дойдугут айылҕатын олус сөбүлээтибит, астынныбыт», — диэн эттэ.