«Азия оҕолоругар» хайыһарынан сүүрүү саҕаланна

Олунньу 27 күнүгэр “Азия оҕолоро” II норуоттар икки ардыларынааҕы кыһыҥҥы оонньууларга хайыһарынан сүүрүүгэ күрэхтэһиилэр саҕаланнылар. Саха сирин спортсменкалара 5 килэмиэтиргэ көҥүл истиилинэн сүүрүөхтэрэ.

Маны тэҥэ, бүгүн 1500 миэтэрэҕэ хайыһарынан сүүрүү, эстафета, шорт-трек, хайа хайыһарыгар слалом-гигант буолаллар.

Хаҥкыга фигурнай хатааһылааһыҥҥа күрэхтэһиилэр салҕаналлар. Уолаттар көҥүл бырагырааманы көрдөрүөхтэрэ. Бу иннинэ кылгас бырагырааманы көрдөрбүттэрэ. Саха сириттэн сылдьар Александр Бородин 8-с миэстэни, Антон Рязанов 12-с миэстэни ылбыттара. Тириэньэрдэрэ – Антон Киселев.

Кылгас бырагыраамаҕа Москваттан Максим Автушенко кыайбыта. Тириэньэрэ – олимпийскай чөмпүйүөн Юлия Липницкая.

Саха сирин хомуур хамаандата хоккейга Уһук Илин уокурук хамаандатын кытары киирсиэҕэ. Бастакы матчка хамаандабыт Кузбасстары кыайбыта, иккискэ Казахстан хоккеистарыгар хотторбута.

«Шерегеш» комплекска хаарга волейбол оонньуута салҕанар.

II  “Азия оҕолоро” норуоттар икки ардыларынааҕы кыһыҥҥы оонньуулар олунньу 23-кулун тутар 5 күннэригэр Кемеровскай уобаласка ыытылла тураллар.

Ил Дархан, бырабыыталыстыба дьаһалтатын пресс-сулууспата.