«Азия оҕолоругар» хас да тыһыынча спортсмен кэлиэҕэ

Ил Дархан Айсен Николаев тэлэбиидэнньэҕэ быһа эпиирин кэмигэр «Азия оҕолоро» оонньууларга бэлэмнэнии үлэтин туһунан ыйыттылар.

— 1996 сыллаахха бастакы бэрэсидьиэн Михаил Николаев тэрийбит бастакы оонньуулара кэлин хайдах сайдыахтарын туһунан ким да билбэт этэ. 2024 сылга ахсыс төгүлүн ыытыллар «Азия оҕолоро» оонньуулара Арассыыйа биир саамай улахан спортивнай тэрээһинигэр кубулуйда. Бүгүҥҥү күҥҥэ 25 дойдуттан, 7 эрэгийиэнтэн (өссө да эбиллиэхтэрэ) кыттарга сайаапканы тутан олоробут. Хас да тыһыынча спортсмен, тириэньэр кэлэрэ күүтүллэр.

Интэриэс улахан. Дойду бырабыыталыстыбата толору өйүүр. Тэрээһин үлэтигэр улахан кыһалҕа суох, үлэлиэххэ эрэ наада. Тэрийэр кэмитиэти Юрий Трутнев салайар. Ахсыс оонньуулар үрдүк таһымҥа ыытыллыахтара диэн эрэллээхпин. Онуоха аэропорт,  уулуссалар, болуоссаттар, олорор уопсайдар, спортивнай комплекстар өрөмүөннэнэллэр. Көҕөрдүү, тупсарыы үлэтэ барыаҕа. Олохтоохтортон эмиэ улахан тутулуктаах, — диэн Ил Дархан бэлиэтээтэ.