Хаартыска sakha.gov.ru ылылынна
Өрөспүүбүлүкэ эдэр волейболистара муус устар 30 күнүгэр Башкортостаҥҥа Уфа куоракка норуоттар икки ардыларынааҕы турнирга кыттар былааннаахтар.
Саха сирин спортсменнара кулун тутарга Соҕуруу Сахалинскайга буолбут Уһук Илиҥҥэ бастыыр иһин күрэхтэһиигэ, иккис миэстэни ылбыттара. СӨ ыстаарсай тириэньэрэ, уолаттарга волейболга эппиэттээх тириэньэр Айсен Жерготов этэринэн, «Азия оҕолоро» норуоттар икки ардыларынааҕы спортивнай оонньууларга бэлэмнэнии былаан быһыытынан баран иһэр.
«Биһиги бэлэмнэниини 2022 сыллаахха Владивостокка VII оонньуу кэнниттэн тута саҕалаабыппыт. Хамаандаҕа Саха сирин волейболга оскуолатын иитиллээччилэрэ талыллыбыттара. Сүүмэрдэммит хамаандаҕа Эдьигээн, Таатта, Чурапчы, Амма, Сунтаар, Нам уонна Дьокуускай оҕолоро бааллар«, — диэн этэр ыстаарсай тириэньэр.
Хамаандаҕа 15-16 саастаах 12 оонньооччу уонна саппааска хандьыдааттар үһүөлэр. Оҕолор нэдиэлэҕэ үстэ ХИФУ уонна АГАТУ баазатыгар дьарыктаналлар.
«Оҕо спордугар норуоттар икки ардыларынааҕы оонньуу улахан эппиэтинэстээх, онон улаханнык долгуйаллар. Төрөппүттэргэ махтаныам этэ, өйөбүллэрин иһин. Кистэл буолбатах, ситиһии төрөппүттэртэн эмиэ тутулуктаах. Бу хамаанданан оонньуур көрүҥ, бииргэ тутуспутунан эрчиллиэххэ, бииргэ иллээхтик олоруохха. сылдьыахха, барытыгар биир сомоҕо буолуохха наада. Оччоҕуна эрэ түмүк, ситиһии баар буолуо. Биһиги бэлэмнэнэрбитигэр усулуобуйа толору тэриллибитэ. Түгэнинэн туһанан Ил Дархан Айсен Николаев баһылыктаах өрөспүүбүлүкэ салалтатыгар оҕо спордун өйүүллэригэр махтанабыт«, — диир Айсен Жерготов.
«Азия оҕолоругар» уолаттарга волейболга күрэхтэһии Дьокуускайга «Стерх» успуорт саалатыгар ыытыллыахтаах.
«Азия оҕолоро» норуоттар икки ардыларынааҕы спортивнай оонньуу Дьокуускайга бэс ыйын 25 — от ыйын 7 күннэригэр буолар. Уопсайа успуорт 24 көрүҥэр 239 кэмпилиэк мэтээл оонньонор.
Санатар буоллахха, Арассыыйа Бэрэсидьиэнэ Владимир Путин Арассыыйаттан уонна аан дойдуттан талааннаах, успуордунан умсугуйар оҕолору түмэр «Азия оҕолорун» оҕо, ыччат успуордун эйгэтигэр саамай интэриэһинэй уонна ситиһиилээх бырайыак диэн бэлиэтээн турар.
Оонньуу сыала — оҕо, ыччат успуордун сайыннарыы уонна норуоттар икки ардыларынааҕы спортивнай бииргэ үлэлээһини бөҕөргөтүү.
СӨ Ил Дарханын уонна Бырабыыталыстыбатын пресс-сулууспата
Емельян Ярославскай аатынан түмэлгэ Аан дойдутааҕы түмэл күнүгэр анаммыт ''Түмэл түүнэ'' тэрээһиҥҥэ элбэх интэриэһинэй экскурсиялар,…
Өрөспүүбүлүкэ сиригэр-уотугар халаан туругун ыам ыйын 18 күнүгэр ыксаллаах балаһыанньаны сэрэтиигэ уонна туоратыыга хамыыһыйа мунньаҕар…
Халаан уутуттан эмсэҕэлиир нэһилиэктэр ахсааннарыгар урут хаһан да киирбэтэх Хатырык нэһилиэгэ улахан ууга ылларан, олохтоохтору…
Ыам ыйын 17 күнүгэр Нам улууһугар «Библионочь-2024» Бүтүн Арассыыйатааҕы аахсыйа Арассыыйаҕа Дьиэ кэргэн сылын чэрчитинэн…
Бүгүн, ыам ыйын 18 күнүгэр, Аан дойду үрдүнэн Түмэл күнэ бэлиэтэнэр. Бу күнү көрсө Амматааҕы…
Эми-тому атыылаһан баран, аны хайдах иһэр туһунан ыйыыны-кэрдиини (инструкцияны) төһө билсэбитий? «Күҥҥэ үстэ биир табылыакканы…