«Азия оҕолоругар» Саха сириттэн 62 оҕо кыттыаҕа

«Азия оҕолоро» кыһыҥҥы оонньуулар быйыл иккис төгүлүн ыытыллыахтара. Оонньуулар Кемеровскай уобаласка (Кузбасска) Кемеровоҕа, Новокузнецкайга, Междуреченскайга уонна Таштогольскай оройуоҥҥа олунньу 23 күнүттэн кулун тутар 5 күнүгэр диэри буолуохтара.

Бырагыраамаҕа успуорт уон көрүҥэ киирдэ: хайыһардаан сүүрүү, хаҥкы успуорда (ол иһигэр шорт-трек), керлинг, сноуборд, фигурнай хаҥкылааһын, хоккей, трамплинтан хайыһарынан ыстаныы, хайыһарынан фристайл, хайа хайыһарын успуорда уонна хаарга волейбол. Итиэннэ көрдөрүүгэ диэн дьон-сэргэ сэҥээриитин ылбыт кибер-­успуорт көрүҥэ сочуоту таһынан ыытыллыаҕа.

Саха сирин сүүмэрдэммит хамаандатыгар 62 спортсмен баар. Оҕолор хайа ха­­йыһарыгар, хаҥкыга, хайыһардаан сүүрүүгэ, сноубордка, фигурнай хаҥкы­лааһыҥҥа уонна хоккейга илин-кэлин түсүһүөхтэрэ.

Устуоруйаны сэгэттэххэ

“Азия оҕолоро” норуоттар икки ардыларынааҕы спортивнай оонньуулар бастакытын 1996 сыллаахха Дьокуускайга ыытыллыбыттара. Мантан ыла Арассыыйа араас куораттарыттан уонна Азия отучча дойдутуттан 10 тыһыынчаттан тахса спорт­смен кыттыыны ылбыта биллэр. Бу оонньуулар үгүс эдэр спорт­смеҥҥа улахан успуорка тахсалларыгар кынат буолбута. Ол курдук, Кузбасс спортсменнара оонньууларга эмиэ ситиһиилээхтик кытталлара, араас көрүҥнэргэ мэтээллэри ылары ситиспиттэрэ.

2019 сыл алтынньытыгар Арассыыйа Федерациятын сиригэр-уотугар норуоттар икки ардыларынааҕы таһым­наах спортивнай күрэхтэһиилэри ыытар уонна тэрийэр биэдэмистибэлэр икки ардыларынааҕы хамыыһыйатын бэрэссэдээтэлэ О.Ю.Голодец Кузбасска “Азия оҕолоро” кыһыҥҥы иккис оонньуулара ыытыллалларын туһунан быһаарыныыны ылыммыта.

Онтон 2020 сыллаахха ахсынньы 19 күнүгэр Кузбасс Губернатора С.Е.Цивилев уонна “Азия оҕолоро” норуоттар икки ардыларынааҕы оонньуулар кэмитиэтин бэрэсидьиэнэ Владимир Максимов Оонньуулар ыытыллалларын туһунан сөбүлэҥҥэ илии баттаабыттара. Онон күрэхтэһиини тэрийии­гэ эппиэтинэстээх тэрилтэнэн Кузбасстааҕы спортивнай тутууларын эрэгийиэннээҕи кииннэрэ ааттаммыта. Ааспыт сыл тохсунньутугар дириэксийэ тэриллибитэ.

Биир ыйынан — оонньуулар

“Кузбасска ыытыллар Азия оҕолоро-2023” дириэксийэтин салайааччытынан Алексей Владимирович Пузынин үлэлиир.

Кини оонньуулар саайтарыгар иһитиннэрбитинэн, аны биир ыйынан Кузбасска буолуох­таах оонньуулары ыытаары күүскэ бэлэмнэнии үлэтэ бара турар. Норуоттар икки ардыларынааҕы стандартарга уонна ирдэбиллэргэ эппиэттиир аныгылыы спортивнай эбийиэктэр тутуллубуттар, тутулла тураллар, социальнай инфраструктура саҥардыллар.

“Аан дойду үгүс дьоно бэйэтэ бырамыысыланнастаах, баай култууралаах, успуорду өрө тутар, аныгы көстүүлээх Кузбасс диэн маннык бэртээхэй сир баарын билиэн баҕарабыт. Сиртэн хостонор баайдаах эрэ диэн буолбакка, аныгы үрдүк технологияларынан, оҥоһууларынан, сонун идиэйэлэринэн, араас хайысхаҕа ситиһиилэринэн эмиэ баай диэн. Биллэн турар, биһиги кыраайбыт сүрүн баайа – кини дьоно-сэргэтэ. Манна 150 нация, норуот уонна этническэй бөлөх биир эйэлээх улахан дьиэ кэргэн буолан олорор.

“Азия оҕолоро” оонньуулар успуорт, ускуустуба, айар дьоҕур уонна доҕордоһуу бырааһынньыга буоларыгар бары күүспүтүн уонна кыахпытын уурабыт. Кузбасска көрсүөххэ диэри!” – диэн Алексей Пузынин этэр.

Хаартыска: https://kuzbass-2023.ru/?p=5101