“Азия оҕолоругар» Сахабыт сирэ хайдах кыттыаҕай

   Кемерово уобалаһыгар “Азия оҕолорун” 2-с кыһыҥҥы Спортивнай оонньууларыгар Сахабыт сирин сүүмэрдэммит хамаандата эрчиллэр-бэлэмнэнэр түмсүүлэри ааһан тиийдэ. Күрэхтэһиилэр олунньу 23- кулун тутар 5 күнүгэр диэри буолаллар.

Узбекистан, Казахстан, Белоруссия, Монголия, Армения уонна Арассыыйа эрэгийиэннэриттэн Уһук Илин, Сибиир, Кемерово, Урал, Саха сирэ оҕолорун хамаандалара спорт 10 көрүҥэр мэтээллэр иһин күрэхтэһиэхтэрэ. Саха сирин хамаандата 7 көрүҥҥэ кыттыаҕа.
Күрэхтэһиилэр түөрт куоратынан ыытыллаллар: Кемеровоҕа – хайыһар, шорт-трек, хаҥкы, керлинг; Новокузнецкайга – шайбалаах хоккей уонна биирдиилээн маастарыстыбаҕа, итиэннэ, фигурнай хаҥкыга; Междуреченскэйгэ – хайаттан хайыһарынан түһүү спорда, хайыһарынан трамплинтан ыстаныы; Таштагол куоракка – сноуборд, фристайл, хаарга волейболлааһын.
Сахабыт сирин сүүмэрдэммит хамаандататын бэлэмин туһунан спорка солбугу бэлэмнээһин Өрөспүүбүлүкэтээҕи Киинин дириэктэрин э.т. Михаил Варламовы уонна “Эллэй Боотур” муус дыбарыаһыгар кыһыҥҥы спорт көрүҥнэрин киинин дириэктэрэ Владимир Хисамутдиновы, Алданнааҕы спорт кыһыҥҥы көрүҥнэригэр спортоскуола дириэктэрэ Михаил Чугунову кытта кэпсэттибит.
Саха сирин дэлэгээссийэтигэр 70 спортсмен-оҕо, 21 тириэньэр, 7 бэрэстэбиитэл, 4 быраас, олор ортолоругар Николай Полятинскай, Анна Антонова, Анна Иванова, Ольга Познякова бааллар. Дэлэгээссийэ салайааччыта Михаил Варламов. Сүрүн тириэньэрдэр: хайыһарга Яков Попов, хоккейга Никита Дружинин, шорт-треккэ Станислав Никитин, фигурнай хаҥкылааһыҥҥа Дарья Андреева, хайаттан хайыһарынан түһүүгэ Артем Ермолаев, хаарга волейболлааһыҥҥа Анатолий Татаев уонна Туйаара Емельянова.
Биллиилээх спортсмен оҕолор ортолоругар, лидердэр быһыытынан, хайыһарга Инна Рыбкинаны, Кирилл Перевозчиковы, хоккейга Всеволод Зазулины, Владимир Глуховы, шорт-треккэ Семен Павловы ааттаталыахха сөп. Онон, ити оҕолорбутун кэтэһэбит.
Үбүлээһин кэмигэр быһаарыллан, хамаандалар өрөспүүбүлүкэ таһынааҕы эрчиллэр-бэлэмнэнэр түмсүүлэри (сбордары) көхтөөхтүк аастылар. Хоккеистар Сахалиҥҥа уонна Приморьеҕа эрчилиннилэр, билигин Новосибирскайга салгыы эрчиллэллэрин быыһыгар олохтоох хамаандалары кытта күрэхтэһэллэр.
Бөлөхтөрүнэн араарылланнар, хоккеистарбыт аан-бастаан, Дальнай Восток, Кемерово, Казахстан хамаандаларын кытта оонньуохтара. Иккис бөлөххө Урал, Сибиир, Белоруссия күүтэллэр. Монголия, Кыргызстан, Узбекистан, Армения атын бөлөххө бааллар. Тириэньэрдэр үс иһигэр киирэргэ суоттаналлар. Шайбаны күүскэ охсууга, киллэриигэ, буллитка маастарыстыбаны көрдөрөр күрэхтэһиигэ эмиэ мэтээлгэ суоттаныы баар. Сахалиннааҕы “Азия оҕолоругар” Иван Чаишвили бастаан турар.
Шорт-трекистар Дальнай Восток чемпионатыгар ситиһиилээхтик күрэхтэһэннэр, “Азия оҕолорун” оонньууларын кэнниттэн Бүтүн Арассыыйатааҕы күрэхтэһиилэргэ кыттар быраабы ыллылар. Семен Павлов мэтээлгэ тиксэригэр эрэл кыыма баар.
Хайыһарга ити үөһээ ааттаммыт оҕолорбут мэтээл иһин киирсиэхтэрэ.

Баһылай Посельскай