«Азия оҕолорун» кэмигэр Этническэй киинэ бэстибээлэ буолуоҕа

Киинэ бэстибээлэ үс сүрүн түһүмэхтээх: киинэ, тыйаатыр, муусука. Бүгүҥҥү күҥҥэ  Индия, Монголия, Кытай, Сербия, Казахстан курдук дойдулартан сайаапкалар киирбиттэр. Дьүүллүүр сүбэ норуоттар икки ардыларынааҕы таһымнаах буолуоҕа. Кытайтан, Казахстантан, Москваттан, Саха сириттэн эспиэрдэр кэлэн, дьүүллүөхтэрэ диэн култуура, духуобунай сайдыы министиэристибэтэ иһитиннэрэр.

Этническэй киинэ бэстибээлигэр 60-150 мүнүүтэ уһуннаах оонньонор киинэлэр кытталлар. Маны тэҥэ, устудьуоннарга тэйиччиттэн куонкурус баар буолуоҕа.

— «Азия оҕолоро» норуоттар икки ардыларынааҕы спортивнай оонньуу чэрчитинэн ыытыллар VII Дьокуускайдааҕы норуоттар икки ардыларынааҕы этническэй киинэ бэстибээлэ бу улахан спортивнай бырааһынньык култуурунай бырагырааматын бэлиэ түгэнэ буолуоҕа. Бу аан дойдуга Азия киинэҕэ ускуустубатын бастыҥ үлэлэрин көрдөрүү эрэ буолбакка, омук ыалдьыттара Саха сирин ураты култууратын кытта билсэллэригэр көмөлөөх буолуоҕа, — диэн киинэ бэстибээлин режиссера Роман Дорофеев кэпсээтэ.

Этническэй киинэ бэстибээлин аһыллыыта уонна сабыллыыта П.Ойуунускай аатынан Саха тыйаатырыгар буолуохтара. Оттон куонкуруска уонна куонкуруһу таһынан киинэлэри көрдөрүү «Лена» киинэ тыйаатырыгар буолуоҕа.