“Азия оҕолорун” кэнниттэн Таилаҥҥа көтөбүт”

VIII “Азия оҕолоро” оонньууларга Узбекистан сүүмэрдэммит хамаандата ох курдук оҥостон кэлэн, күрэхтэһэ сылдьар.

“250-ча киһилээх хамаанда чартернай рейсинэн Дьокуускайга кэлэн түспүппүт, — диир Айнура Шабакова, Узбекистан сүүмэрдэммит хамаандатын тустуук кыргыттарын тириэньэрдэрэ. – Биһигини үөрэ-көтө көрсүбүттэрэ, олорор, күрэхтэһэр усулуобуйабыт, остолобуой аһылыга барыта үчүгэй. Сэттэ тустуук кыыһы аҕалбыппыт, биир кыыспыт кыһыл көмүһү, биир кыыспыт үрүҥ көмүһү, биирбит боруонса мэтээллэри ылан үөртүлэр. “Азия оҕолоругар” бэлэмнэммиппит ыраатта, хас да талар тууру ааспыт оҕолор кэлбиттэрэ.  Саамай күүстээх күрэстэһээччинэн Корея хамаандата буолла. Билигин экскурсиялар саҕаланнылар, бу Ирбэт тоҥ саарыстыбатын көрө баран иһэбит”.

Айнура Шабакова Узбекистаҥҥа Каракалпакскай өрөспүүбүлүкэҕэ олорор, үлэлиир. Тириэньэрдээбитэ 15 сыл буолбут, элбэх маастары иитэн таһаарбыт.

“Биир кыыһым Парижка Олимпиадаҕа бараары бэлэмнэнэ сылдьар. Бу “Азия оҕолоро” оонньуулар бүттүлэр да, от ыйын 12 күнүгэр Таилаҥҥа Азиатскай күрэхтэһиилэргэ көтөбүт”, — диэн кэпсээнин түмүктээтэ тустуук кыргыттар тириэньэрдэрэ.

Биһиги Дьокуускайбыт, “Азия оҕолоро” оонньууларбыт итинник норуоттар икки ардыларынааҕы улахан күрэхтэһиилэр сиэккэлэригэр киирэн туралларын истиэххэ эриэккэс.