Хаартыска СИА
Дьокуускайга Н.Н.Тарскай аатынан «Туймаада» стадиоҥҥа ыытыллар «Азия оҕолоро» норуоттар икки ардыларынааҕы спортивнай оонньуулары үөрүүлээхтик аһыы сүрүн тиэмэтинэн «Арктика сиригэр-уотугар айан» буолуоҕа.
Оонньуу кыттыылаахтарын уонна көрөөччүлэри бу ураты эйгэҕэ үс чаастаах бырагыраама күүтэр. Үөрүүлээх тэрээһин үгэс курдук спортсменнар парааттарыттан саҕаланыа.
Тэрээһин туруорааччы режиссера Руслан Тараховскай иһитиннэрбитинэн, үрүҥ түүн хайдах баар буолбутун туһунан Арктика норуоттарын номохторугар олоҕуран туроруллубут оонньуу көрдөрүллүө. Биллэн турар, киһи сөҕө-хайгыы көрөр-истэр ырыалара, үҥкүүлэрэ болҕомтону тардыахтара. Өрөспүүбүлүкэ 22 улууһуттан үҥкүү кэлэктииптэрэ, ол иһигэр уон биир кэлэктиип хотугу улуустан кыттыыны ылаллар. Маны таһынан, Дьокуускайтан «Сюрприз», «Маска», «INCIDE», «Бриллианты Якутии», «Геркилэн», «Версия», «DIJIT PROJEKT», «Автобус радости» уо.д.а. көрүөххүт.
Саха академическай драматическай тыйаатырын, үҥкүү национальнай тыйаатырын, «Гулун» хотугу аҕыйах ахсааннаан төрүт олохтоох норуоттар, Олоҥхо, опера уонна балет, нуучча драматическай, үүнэр көлүөнэ тыйаатырдарын артыыстара, цииркэ, филармония артыыстара, балет оскуолатын уонна музыка үрдүкү оскуолатын үөрэнээччилэрэ, Дьокуускай айар кэлэктииптэрэ болҕомтону тардыахтара.
Барыта түөрт тыһыынча киһи кыттыыны ылара былааннанар. Ол иһигэр 9-16 саастаах 1,8 тыһ.оҕо уонна улуустартан уопсайа 2,2 тыһ. улахан дьон түһүлгэҕэ түмсүөхтэрэ. Быйылгы «Азия оҕолоро» саҕаланыытын уонна түмүктэниитин далааһыннаах тэрээһиннэрэ федеральнай тэрээһиннэртэн хаалсыахтара суоҕа. Оттон «Азия оҕолоро» оонньууларга Дьокуускай араас былаһааккаларыгар бэс ыйын 1 — от ыйын 6 күннэригэр култуура 50-тан тахса араас тэрээһинэ ыытыллыаҕа.
«Азия оҕолоро» оонньуулары арыйыы тэрээһинэ бэс ыйын 26 күнүгэр «Туймаада» стадиоҥҥа үөрүүлээх быһыыга-майгыга саҕаланыа. Билиэти бу сигэнэн киирэн ылыаххытын сөп: //childrenofasia.ru/.
Култуура бырагыраамата бэс ыйын 1 күнүттэн «Арассыыйа — мин историям» пааркаҕа «От идеи к истории Игр «Дети Азии» быыстапкаттан саҕаланыа. Манна СӨ Бастакы Бэрэсидьиэнэ М.Е.Николаев көҕүлээһининэн тэриллибит «Азия оҕолоро» оонньуулар историялара сырдатыллыа.
Ил Дархан Айсен Николаев: «Азия оҕолоро» норуоттар икки ардыларынааҕы VIII спортивнай оонньуу 2024 сылга дойду сиригэр-уотугар биир саамай улахан далааһыннаах тэрээһининэн буолуоҕа уонна үрдүк таһымнаахтык ыытыллыаҕа«, — диэн эрдэ этэн турар.
РФ Бэрэсидьиэнэ В.Путин «Азия оҕолорун» оҕо уонна ыччат успуордун эйгэтигэр биир саамай интэриэһинэйинэн уонна ситиһиилээҕинэн ааттаабыта.
«Азия оҕолоро» далааһыннаах тэрээһин бэс ыйын 25 — от ыйын 7 күннэригэр буолар. 27 дойдуттан 32 хамаанда кыттыыны ылар.
СӨ Ил Дарханын уонна Бырабыыталыстыбатын пресс-сулууспата
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…