«Азия оҕолорун» логотибын күндү тааһынан оҥордулар

Олунньу 24 күнүттэн кулун тутар 12 күнүгэр диэри Кемерово куоракка Кузбаастааҕы кыраайы үөрэтэр судаарыстыбаннай түмэлгэ «Сокровища Якутии. Кузбасс-2023» диэн быыстапка турар. Быыстапка Кемеровскай уобаласка ыытыллар «Азия оҕолоро» кыһыҥҥы спортивнай иккис оонньуулар иитинэн тэрилиннэ.

Манна Саха Өрөспүүбүлүкэтин сыаналаах малын судаарыстыбаннай хранилищетыттан 113 биридимиэт көрдөрүүгэ турда. Ол иһигэр алмаастар, ураты быһыылаах күндү таастар, кыһыл көмүс кутуулар, национальнай киэргэллэр, ювелирнай уонна муос оҥоһуктар быыстапканы киэргэттилэр.

Быыстапка сүрүн экспоната — күндү таастарынан оҥоһуллубут кыһыҥҥы оонньуулар логотиба. 263,16 караат ыйааһыннаах кырыыламматах алмааһынан, 421,89 караат ыйааһыннаах топаһынан, хромдиопсидынан, цирконунан суруллубут эмблема 32х45 см кээмэйдээх.

Оонньуулар ыалдьыттарыгар, кыттааччыларыгар уонна Кемеровскай уобалас олохтоохторугар анаммыт Саха сирин быыстапката кулун тутар 12 күнүгэр диэри туруоҕа.