Бүтүн Арассыыйатааҕы «Смотри, это Россия!» куонкурус кыайыылаахтара ааттаннылар

Ахсынньы 24 күнүгэр «Смотри, это Россия!» Бүтүн Арассыыйатааҕы күөн күрэс түмүгэ таһаарылынна. Саха сирин көҕүлээһининэн тэриллибит күрэс бэһис төгүлүн ыытылынна уонна дойду 89 эрэгийиэниттэн 33 245 үөрэнээччини түмтэ.

Быйылгы куонкурус Аҕа дойду сэриитигэрУлуу Кыайыы 80 сылыгар ананна. Тэрийээччилэр бэлиэтээбиттэринэн, ордук элбэх сайаапка, былырыыҥҥы курдук, Донбасстан, Саха сириттэн, Москваттан киирбит. Уопсайынан, Арассыыйа бары эрэгийиэннэриттэн үөрэнээччилэр уонна уһуйааччылар көхтөөх кыттыыны ылбыттар.

«Күөн күрэскэ кыттыбыттары уонна кыайыылаахтары барыларын ис сүрэхпиттэн эҕэрдэлиибин. Эһиги — эрэгийиэҥҥит, модун Арассыыйабыт киэн туттуута уонна кэскилэ буолаҕыт. Эһигинэн киэн туттабыт«, — диэн Ил Дархан Айсен Николаев оҕолорго туһаайан эҕэрдэтин тиэрдэр.

Бырайыак иитинэн, кыттааччылар хамаандалара үстүү мүнүүтэлээх видеоролигы устан ыыталлара уонна бу үлэлэрин RUTUBE платформаҕа туруораллара ирдэммитэ. Видеоҕа кинилэр хос эһэлэрэ, хос эбэлэрэ Улуу Кыайыы туһугар киллэрсибит кылааттарын кэпсиэхтээхтэрэ: ханна кыттыыны ылбыттарын, наҕараадаларын, дьоруойдуу быһыыларын. Устубут үлэлэрэ дойду атын эрэгийиэннэрин үөрэнээччилэригэр ыытыллаллар.

«Маннык бырайыактар дойдубут историяҕа киирбит ситиһиилэрин үйэтитэргэ көмөлөһөллөр. Маны сэргэ, кэнчээри ыччат дойдутун кэскилин туһугар эппиэтинэһи сүгэригэр көҕүлүүллэр. Бу сезон тиэмэтэ Улуу Кыайыы 80 сылыгар аналлаах буолан, биһиги улуу дойдубут бары муннуктарыттан оҕолору түмтэ уонна ытык дьоммут хорсун быһыыларын сыаналыылларыгар сирдиир. Биһиги ытык дьоммут Кыайыыга кылааттарын туһунан киэн тутта кэпсиибит. Севастопольтан, Ставропольтан уонна Саратовтан кыттааччылары кыайыыларынан уонна биһиги өрөспүүбүлүкэбит эдэр талааннарын истиҥник эҕэрдэлиибин. Хас биирдии үлэ бэриллибит тиэмэни арыйан, норуоппут биир сомоҕо буоларын, кыаҕын көрдөрөр, ис сүрэхтэн толоруллар«, — диэн СӨ Бырабыыталыстыбатын Бэрэссэдээтэлин солбуйааччы Анатолий Семенов бэлиэтиир.

Аһаҕас куоластааһын түмүгүнэн сүрүн куонкурус кыайыылаахтарынан  буоллулар:

6-10 саастаахтарга
«Инженерочка» хамаанда (Севастополь)
Салайааччы: Марченкова Екатерина Михайловна.
«Дедушкин портрет» (Дьокуускай)
Салайааччы: Обутова Александра Васильевна.

11-15 саастаахтарга
«ГимназистыГео» хамаанда (Ставрополье кыраайа)
Салайааччы: Алексина Елена Юрьевна.
«Экипаж» (Амма, Саха сирэ)
Салайааччы: Яковлева Марфа Константиновна.

16-18 саастаахтарга
«Пугачевцы» (Саратов уобалаһа)
Салайааччы: Ольга Владимировна Тегай.
«Патриоты наслега» (Улахан Аан, Хаҥалас, Саха сирэ)
Салайааччы: Громова Надежда Петровна.

СӨ Ил Дарханын уонна Бырабыыталыстыбатын пресс-сулууспата