Бааһыналарга үлэ үмүрүйэн эрэр

Күһүҥҥү хомуур үлэтэ түмүктэнэн эрэр. Ол курдук, СӨ Тыатын хаһаайыстыбатын уонна аска-үөлгэ бэлиитикэтин  министиэристибэтин Үүнээйини ылыыга департаменын иһитиннэриитинэн, алтынньы 7 күнүнээҕи туругунан уопсайа 9236 гектар бурдук хомулунна. Гектартан ортотунан 9,8 центнер үүнүүнү ыллылар.

Өрөспүүбүлүкэ араас көрүҥнээх хаһаайыстыбалара 61940 туонна хортуоппуйу хостоотулар. Былырыын бу кэмҥэ 72646 туонна этэ. Орто үүнүү – гектартан 101 центнер.

Аһаҕас груҥҥа үүннэриллибит оҕуруот аһын 18694 туоннаны (102 быр.) хомуйан, дьаһайдылар. Төһө да ардах эҥин мэһэйдээтэр,  11543 туонна хаппыыстаны, 2763 туонна моркуобу, 2274 туонна сүбүөкүлэни, 2115 туонна атын оҕуруот аһын хомуйдулар. Хомуллубут оҕуруот аһа “Сайсары” бааһынай ырыынагар атыыланар.  Дьокуускай олохтоохторо хаппыыстаны хото атыылаһаллар.

Хаартыска: В.Бурнашев (архыып)