Бааһырбыт байыас Майыар амарах санаалаах олохтоохторугар махтанар

Абый улууһун Майыар национальнай нэһилиэгэ улуус кииниттэн 170 км соҕуруу Индигиир өрүс үрдүгэр турар, 500-н тахса киһи олорор. Хоту дойду хоһуун дьоно төрүт дьарыктарынан – таба иитиитинэн, булдунан-алдынан дьарыктаналлар.

Элэккэй майгылаах, амарах дууһалаах хоту сир дьоно-сэргэтэ кыһалҕалаахха көмөлөһөр үгэстээхтэр. Ол курдук Абый улууһун Майыар оскуолатын үөрэнээччилэрэ, учууталлара, олохтоохторо  байыаннай дьайыы саҕаланыаҕыттан тиһиктээхтик көмөлөһөллөр.

Бу күннэргэ Санкт-Петербург госпиталыгар сытар саллаат реанимацияттан уопсай балаатаҕа тахсыбытыгар волонтердарбыт Саха сириттэн көмө быһыытынан тиийбит, төрүт астарбытын илдьэн күндүлээтилэр. Байыас Майыар нэһилиэгин олохтоохторо ыыппыт тоҥ балыктан «Индигирка» салааттарын сиэн олус үөрбүтүн, дуоһуйа, астына сиэбитин, махтанарын этэр.

Байыас  байыаннай дьайыыга сылдьан этин-сиинин уокка улаханнык сиэтэн, бааһыран, эпэрээссийэ кэнниттэн ый кэриҥэ реанимацияҕа сыппыт. Сотору өссө биир эпэрээссийэни ааһыахтаах. Кини ийэм, дойдум дьоно, волонтердар өйүүр буоланнар, санаам бөҕөх диэн санаатын үллэстэр.