Бааһырбыт байыастары көрөр-харайар көмөлөһөөччү өҥөтө баар буолла

Байыаннай дьайыы кыттыылаахтарыгар саҥа көмө миэрэтэ — бааһырбыт байыастары көрөргө-харайарга көмөлөһөөччү өҥөтө баар буолла.  Бу туһунан үлэ, социальнай сайдыы миниистирэ Елена Волкова брифинг кэмигэр иһитиннэрдэ. 

2023 сыл балаҕан ыйыгар Саха сирэ кыаммат дьону уһуннук көрүү-харайыы систиэмэтин киллэриигэ пилотнай эрэгийиэн буолбута. Билигин өрөспүүбүлүкэҕэ бу систиэмэ технологияларын киллэриигэ көхтөөх үлэ ыытыллар.

— Анал байыаннай дьайыы кыттыылаахтарыгар бу систиэмэ өрөспүүбүлүкэ үрдүнэн үлэлиэҕэ. Кинилэргэ көрүү-харайыы өҥөтө наада буоллаҕына, ханна олороруттан тутулуга суох, көмөлөһөөччү баар буолуоҕа. Маннык түгэҥҥэ байыаннай дьайыы кыттыылааҕа, эбэтэр, дьиэ кэргэнин чилиэнэ олорор сиринэн социальнай көмүскэл управлениетыгар баран, сайабылыанньа суруйуохтаах, — диэн миниистир быһааран биэрдэ.

Маны тэҥэ, өрөспүүбүлүкэҕэ доруобуйаны чөлгө түһэрии тэхиньиичэскэй тэриллэрин уларсыы пууннара үлэлииллэр. Ол курдук, маннык пууннар 11 улууска бааллар. Бу пууннартан баттыктан саҕалаан, кэлээскэҕэ тиийэ уларсыахха сөп.

«Быйыл маннык пууннары бары улуустарга арыйар былааннаахпыт», — диэн Елена Волкова эрэннэрдэ.